ՆԱՏՕ-ի գլխավոր քարտուղար Յենս Ստոլտենբերգը, խոսելով C-400 զենիթահրթիռային համակարգերի գնման վերաբերյալ ռուս-թուրքական գործարքի մասին, նշել է, որ դա բացառապես Թուրքիայի ազգային որոշումն է, և իրենց հուզող միակ բանն այդ սպառազինության՝ ՆԱՏՕ-ի զինատեսակների հետ համադրելու հնարավորության խնդիրներն են:
Ինչպես գրում է թուրքական T24 կայքը, Ստոլտենբերգը խոստովանել է, որ դա բավականին բարդ թեմա է իրենց համար:
«Մեզ համար կարևորն այդ զենիթահրթիռային համակարգերի՝ մեր համակարգերին ինտեգրման խնդիրն է: Պետք է նշեմ, որ դա բարդ թեմա է», - ասել է ՆԱՏՕ-ի գլխավոր քարտուղարը՝ ընդգծելով, որ Թուրքիան, ելնելով իր աշխարհագրական դիրքից, շատ կարևոր գործընկեր է իրենց համար:
«Թուրքիան մեր շատ կարևոր անդամն է: ՆԱՏՕ-ի համար մի շարք հարցերում կարևոր առավելություններ է ապահովում: Նրա աշխարհագրական դիրքը՝ Սիրիային և Իրաքին սահմանակից լինելը կարևոր է դարձնում նրա դերն ահաբեկչության դեմ պայքարում: Բացի այդ՝ Սև ծովից ելք ունենալը նույնպես ապահովում է Թուրքիայի կարևոր դիրքը ՆԱՏՕ-ում», - ասել է Ստոլտենբերգը:
«Ռոստեխ» պետական կորպորացիայի գլխավոր տնօրեն Սերգեյ Չեմեզովն ավելի վաղ հայտնել էր, որ Թուրքիայի և Ռուսաստանի միջև ռուսական C-400 զենիթահրթիռային համակարգերի գնման վերաբերյալ գործարքն արժեցել է ավելի քան 2 մլրդ դոլար։
ԱՄՆ ռազմաօդային ուժերի փոխնախարար Հեյդի Գրանտը շեշտել էր, որ C-400 համակարգերի գնումը կարող է խնդիրներ առաջացնել նաև ԱՄՆ-ի կողմից Թուրքիային F-35 կործանիչների մատակարարման հարցում, ինչը նախատեսված է իրականացնել 2018 թվականին։