Կիպրոսի նախագահ Նիկոս Անաստասիադիսը հայտարարել է, որ եթե Թուրքիան դադարի Կիպրոսի ափերի մոտ խոչընդոտել հունական կողմի՝ բնական գազի արդյունահանման աշխատանքներին, ապա Կիպրոսը պատրաստ է թերակղզու հիմնախնդրի շուրջ վերսկսել թուրքական կողմի հետ քաղաքական բանակցությունները:
Ինչպես գրում է թուրքական «Հյուրրիյեթ» պարբերականը, նախագահը շեշտել է, որ կղզու բնական պաշարները պատկանում են Կիպրոսի Հանրապետությանը և որ նման խախտումներն ուղղված են Կիպրոսի ինքնիշխանության դեմ:
«Թուրքիայի և Կիպրոսի թուրքերի հռետորաբանությունը սխալ և անհասկանալի է։ Դրանք չեն բխում Կիպրոսի ժողովուրդների շահերից։ Կոչ եմ անում Թուրքիային և Հյուսիսային Կիպրոսին վերջ դնել Կիպրոսի Հանրապետության ինքնիշխանության դեմ նման խախտումներին»,-ասել է Կիպրոսի նախագահը։
Հիշեցնենք, որ թուրքական նավատորմի նավերը տևական ժամանակ է, ինչ խոչընդոտում են Saipem 12000 հորատման լողացող կայանքի աշխատանքները Միջերկրական ծովում, որը նավթի հորատում է իրականացնում իտալական ENI նավթային ընկերության համար: Նշենք, որ հորատման աշխատանքներն իրականացվում են Կիպրոսին պատկանող տնտեսական տարածքում։