ՀՀ Ազգային ժողովի պատգամավոր Գալուստ Սահակյանը և մի շարք այլ պատգամավորներ օրենսդրական փոփոխության առաջարկ են ներկայացրել Կառավարությանը, որը վերաբերում է Քրեական դատավարության օրենսգրքին:
Կառավարության նիստին ՀՀ արդարադատության նախարար Դավիթ Հարությունյանն ասաց, որ առաջարկության բուն էությունն այն է, որ եթե քննիչը որոշում է կասեցնել քրեական գործի վարույթը, դրա մասին տեղեկացնի տուժողին, քաղաքացիական հայցվորին, քաղաքացիական պատասխանողին, իսկ որոշակի դեպքերում՝ նաև մեղադրյալին:
«Առաջարկության հեռահար նպատակն այն է, որ այդ անձինք, տեղեկացված լինելով, հնարավորություն ունենան բողոքարկելու համապատասխան ակտը: Գաղափարը լավն է, մենք պաշտպանում ենք այն, սակայն որպեսզի այն արդյունավետ կյանքի կոչվի, մի շարք առաջարկություններ ենք ներկայացրել, առանց որոնց ընդունման այս ակտը չի ծառայի իր նպատակին: Այնպես որ, առաջարկում ենք տալ դրական եզրակացություն՝ նշելով, որ դա պայմանավորված է մեր առաջարկությունների ընդունմամբ»,- ասաց Դավիթ Հարությունյանը:
Նախագիծն ընդունվեց: Դավիթ Հարությունյանը ներկայացրեց նաև Քրեական դատավարության և Քաղաքացիական դատավարության օրենսգրքերում փոփոխություններ և լրացումներ կատարելու մասին օրենսդրական փաթեթը:
«Դատական օրենսգիրքն արդեն ընդունվել է Ազգայի ժողովի կողմից, որը սկսելու է գործել ապրիլի 9-ից, իսկ Դատական օրենսգրքում նորովի են կարգավորված մի շարք հարցեր, որոնք վերաբերում են վարույթի հրապարակայնությանը, դատավարության լեզվին, դատավարության կազմին, ինքնաբացարկին և այլն:
Այս բոլոր փոփոխությունները, որոնք նորովի են կարգավորվել, պետք է իրենց արտացոլումը գտնեն դատավարական օրենսգրքերում»,- ասաց Արդարադատության նախարարը:
Միաժամանակ, Դավիթ Հարությունյանն ասաց, որ Քրեական դատավարական օրենսգրքում առաջարկվում է կիրառել Մարդու իրավունքների եվրոպական դատարանի պրակտիկան խափանման միջոցների վերաբերյալ և որոշ կարգավորումներ հստակեցնել:
Նախագիծն ընդունվեց:
