Ֆիլիպիններում գրեթե յուրաքանչյուր 2-րդ ընտանիքն իրեն աղքատ է համարում: Ծանր նյութական դրությունը ծնողներին դրդում է երեխաներին զրկել մանկությունից, նրանց ստիպել ապրել երեխային ոչ բնորոշ կյանքով: Հաճախ նրանց ուսերին այնպիսի պատասխանատվություն է դրվում, որն իրականում արդարացի չէ նման տարիքի մարդու նկատմամբ:
Այդպիսի երեխաներից մեկը 7-ամյա Ջասթինն է, որի՝ մեկ տարեկան եղբոր հետ արված հուզիչ լուսանկարը լայն տարածում է գտել համացանցում:
Ինչպես նշում է AdMe.ru-ն, լուսանկարը հրապարակվել է ֆիլիպինյան դպրոցներից մեկի ֆեյսբուքյան էջում: Լուսանկարի հեղինակն ուսուցչուհին է, որը դասի սկզբում նկատել է, որ աշակերտներից մեկը միայնակ չի եկել դպրոց:
Ջասթինը նստել է դասասեղանի մոտ ու գրկում պահել մեկ տարեկան եղբորը: Երբ ուսուցչուհին հետաքրքրվել է՝ ինչու է տղան փոքրիկին իր հետ բերել, իմացել է, որ երեխային այլ խնամող չկար: Ջասթինը պատմել է, որ ապրում է տատիկի հետ, որն առավոտից երեկո աշխատում է ֆերմայում:
Իհարկե, Ջասթինը կարող էր տանը մնալ ու խնամել եղբորը, սակայն նա չէր ցանկանում բացակայել դպրոցից, ուստի՝ եղբորը հետն էր վերցրել:
Հուզիչ լուսանկարը տարածվել է համացանցում՝ մարդկանց ստիպելով խորհել մանկության ու ընտանիքի խնդիրների մասին:
