Ամերիկյան The Wall Street Journal պարբերականի մարզական մեկնաբան Ջեյսոն Գեյը Փհենչհանի Օլիմպիական խաղերին ներկայացած ռուս մարզիկներին արտաքինը ոճային է գնահատել:
«Դա հիանալի է: Հաշվի առնելով այն ողջ նախաօլիմպիական խելահեղությունը՝ ռուսներն ուղղակի կարող էին հրաժարվել համազգեստից, սակայն նրանք ջանք չեն խնայել և շահել են Օլիմպիական խաղերի ոճի մրցույթում», - Lenta.ru-ի փոխանցմամբ՝ գրել է լրագրողը:
Ամերիկացի լրագրողը ռուս մարզիկների արտաքին տեսքը համեմատել է Տոնգայի հանրահայտ ներկայացուցչի հանդերձանքի հետ, որը ձմեռվա եղանակային պայմաններում բացման արարողությանը ներկայացել էր առանց վերնազգեստի՝ իրենց ավանդական ազգային տարազ հանդիսացող կիսաշրջազգեստով:
Ռուսաստանյան պատվիրակությանն արգելվել է ազգային խորհրդանիշ պարունակող հագուստ կրել, իսկ մարզիկները հանդես են գալիս օլիմպիական դրոշի ներքո՝ ՌԴ օլիմպիական կոմիտեի որակազրկումների պատճառով:
