Ռուսաստանի և Եվրոպայի միջև պատերազմի վախը մեծացել է, երբ Կրեմլը հայտարարել է, որ նոր կործանիչ է փորձարկում: Այս մասին գրում է բրիտանական Daily Express պարբերականը «Պուտինը նոր գաղտնի զենք է փորձարկում» խորագրով հոդվածում:
Ինչպես նշում է պարբերականը, խոսքը Սու-57 ստելս տեխնոլոգիայով կործանիչի մասին է: Ռուսաստանը հայտարարել է 12 նման ինքնաթիռ ձեռք բերելու մասին, որոնք կարող են սպառազինման անցնել հաջորդ տարվանից:
Վկայակոչելով ՌԴ պաշտպանության փոխնախարար Յուրի Բորիսովին՝ աղբյուրը հաղորդում է, որ դրանցից 10-ն արդեն փորձարկման փուլում են գտնվում:
Հոդվածում նշվում են Սու-57-ի հատկությունները, որը ռադիոէլեկտրոնային սարքավորման նոր համալիրի շնորհիվ կարող է արագորեն վերլուծել մարտական իրավիճակը: Այն համալրված է նաև հզոր ռադարով, որը թույլ է տալիս հայտնաբերել մեծ հեռավորությամբ գտնվող օդային և ցամաքային թիրախները, ինչպես նաև չեզոքացնել դրանք հեռահար հրթիռների օգնությամբ: