35 ամյա Արմենուհի Հակոբյանը, ով երեք անչափահաս երեխաների միայնակ մայր է, արդեն մի քանի ամիս է «Արմենիա» ԲԿ դիմածնոտային բաժանմունքում է` ծանր առողջական խնդիրներով։
Tert.am-ի հետ զրույցում Արմենուհու սկեսուրը՝ Հռիփսիմե Էլբակյանը պատմեց, որ խնդիրները սկսվել են ատամի հեռացումից հետո, ծնոտը թարախակալվել է ու փտում է, իսկ թոքերի խնդիրն էլ, որ ավելի վաղ է ունեցել, ներկայումս սրվել է՝ մի թոքը գրեթե գոյություն չունի, իսկ հետազոտության արդյունքում բժիշկները սրտի ու թոքի արանքում հայտնաբերել են գոյացություն: Բժիշկները նշանակել են թոքի հյուսվածքների բիոպսիա:
«Ծանր, անելանելի վիճակով հիմա պառկած է վերակենդանացման բաժանմունքում: Սարսափելի վիճակ է, հասավ այն պահին, որ ծնոտը արդեն պետք հեռացնեին՝ սևացավ: Ասեցին՝ մինչև թարախը չկտրվի, չենք կարողանա թոքին ձեռք տանք, մի ամիս շարունակ աշխատեցին ծնոտի վրա, թոքը շարքից դուրս եկավ: Բժիշկներն ասում են՝ եթե բարձր դոզայով սրսկենք, կմնա սեղանի վրա, շնչառություն չունի, գիշերները նստած է լուսացնում, հևալով է շնչում ու մինչ օրս այդպես է, ատամի թարախն էլ չի կտրվում ու չի լավանում»,-արցունքն աչքերին պատմեց տիկին Հռիփսիմեն:
Արմենուհու ամուսինը՝տիկին Հռիփսիմեի որդին, թեև ֆիզիկապես կա, բայց ընտանիքից վաղուց հեռացել է:
Արմենուհին ապրում է Արմավիրի մարզի Բաղրամյան գյուղում վարձով բնակարանում` երեք անչափահաս երեխաների հետ: Ընտանիքի գոյատևման աղբյուրը 36 հազար դրամ նպաստն է: Մինչ հիվանդանալն Արմենուհին աշխատել է: Այս օրերին տիկին Հռիփսիմեն տեղափոխվել է նրանց տուն, երեխաներին է խնամում:
Արմենուհի Հակոբյանը, թեև նպաստառու է, բուժվում է պետպատվերի շրջանակում, բայց տիկին Հռիփսիմեի խոսքով, լրացուցիչ ծախսեր կան՝ դեղերի գումար, վիրահատության անհրաժեշտություն, որի համար համապատասխան ֆինանսներ չունեն:
«Որ ասեմ պատերն ու մահճակալն է միայն ձրի, հավատա: Գրում են, դեղերը մենք ենք առնում ծայրահեղ վիճակով: Ես սխալվեցի 2 տարի առաջ վարկ գրվեցի, չեմ կարողանում հիմա երեխեքիս օգնեմ: Ինքն ինչ աշխատանք ասես արել է՝ ուրիշների տուն է մաքրել, ամառը ծիրան է հավաքել, խաղող է քաղել, ինքը թխվածքի վարպետ է, բայց չկարողացավ աշխատել, ժամը 4-ից արթնանում էր գնում էր, որ աշխատեր: Այդ գոլորշին, այդ գնալը գալը իր տունը քանդեց: Ինքն ասեց այ կնիկ մեռնում եմ, հոգ տար իմ համար, բա ես փողի համար մեռնեմ, երեխեքս մնան որբ: Իմ միակ ցանկությունն է, որ մի փոքր գումար լինի երկու վիրահատության և՛ ծնոտի, և՛ թոքի վիրահատություն, որ դեռ բժիշկները կոնկրետ չեն ասել, չգիտենք ոնց կլինի վիճակը»,-ասաց տիկին Հռիփսիմեն:
Արմենուհու երեք երեխաները՝ երկու աղջիկներն ու ավագ որդին, որ 14 տարեկան է, այս պահին միայն մեկ ցանկություն ունեն.
«Իմ ցանկությունն է, որ մամաս շուտ լավանա, մենք ոչ մի բանի կարիք չունենք, մենակ էդ ա»,-ասաց Արմենուհու որդին՝ Անուշավանը:
«Ես ուզում եմ, որ մամաս շուտ լավանա գա տուն»,-ասաց քույրը Հռիփսիմեն՝ հազիվ զսպելով արցունքները:
Գրեթե բոլոր ծանոթներից ու հարեւաններից պարտք են վերցրել Արմենուհու ընթացիկ բուժումների, տոմոգրաֆիայի և այլ հետազոտությունների համար, պատմեց տիկին Հռիփսիմեն՝ նշելով, որ արդեն անելանելի դրության մեջ են և ակնկալում են որոշակի օգնություն Արմենուհու կյանքը փրկելու համար:
«էրեխեքս չմնան անծնող, անմայր:Մայրը շատ բան է արել երեխաների համար, այդ մտածմունք էլ է իրեն վատացնում, որ պառկած է, ոչ մի բան չի կարողանում անել երեխեքի համար»,-ասաց տիկին Հռիփսիմեն:
Մանրամասները՝ տեսանյութում։