Թուրքիայի նախագահ Ռեջեփ Թայիփ Էրդողանը ժամանել է Իտալիա, որտեղ կանգ է առել Հռոմի Վենետո փողոցի վրա գտնվող Westin Excelsior հյուրանոցում: Հյուրանոցի շրջակա տարածքն ու հարևան փողոցներն Էրդողանի այցի պատճառով փակ են եղել դեռ շաբաթ օրվանից, տարածքը լի է հազարավոր ոստիկաններով: Այս մասին գրում է BBC-ի թուրքական ծառայությունը:
Նախատեսվում է, որ Էրդողանն այսօր կհանդիպի Հռոմի պապ Ֆրանցիսկոսի, ինչպես նաև Իտալիայի նախագահ Սերջիո Մատարելայի հետ:
Ինչպես ավելի վաղ հայտնել է tert.am-ը, Էրդողանին Վատիկան այցի ժամանակ կուղեկցի անվտանգության 3.500 աշխատակից:
Այցի ընթացքում նախատեսվում է Պապի հետ քննարկել Երուսաղեմի կարգավիճակի հարցն ու մի շարք այլ տարածաշրջանային խնդիրներ:
Մինչ Թուրքիայից մեկնելը լրագրողների հետ զրույցում, խոսելով վատիկանյան այցից իր սպասումների մասին, Էրդողանն ասել է. «Մենք ցանկանում ենք Եվրամիության լիիրավ անդամ դառնալ»:
Ավելի վաղ լրատվամիջոցները գրել էին, որ Թուրքիայի նախագահ Ռեջեփ Թայիփ Էրդողանը Վատիկանում Հռոմի պապի հետ փետրվարի 5-ին կայանալիք հանդիպումը կարող է օգտագործել Հայաստանի հետ հարաբերությունները նորմալացնելու համար։ Այս կարծիքն էր, մասնավորապես, հայտնել Regnum լրատվական գործակալության եկեղեցա-քաղաքական նյութերի գլխավոր խմբագիր Ստանիսլավ Ստրեմիդլովսկին:
Հիշեցնենք, որ սա Թուրքիայի նախագահի մակարդակով առաջին նման այցն է Վատիկան 59 տարվա դադարից հետո: Իսկ Հռոմի պապը Թուրքիա էր այցելել 2014 թվականին:
