Ֆիլիպիններում տասնյակ հազարավոր մարդիկ ստիպված են եղել լքել իրենց տները՝ մոտակայքում ժայթքած Մայոն հրաբխի պատճառով, հայտնում է Al Arabiya-ն:
Այժմ ավելի քան 70.000 մարդ տեղակայված է դպրոցներում, փակ մարզադահլիճներում, այլ շինություններում: Որոշ ապաստարաններում մարդիկ ստիպված են գետնին քնել ու մոտ 50 հոգով օգտվում են նույն զուգարանից:
«Նրանք շատ վախեցած են»,-նշել է քաղաքացիական պաշտպանության գրասենյակի ղեկավարը՝ հավելելով, որ այժմ 360.000 մարդ շնչում է հրաբխային մոխրով հագեցած օդը:
Մինչդեռ կան մարդիկ՝ զբոսաշրջիկները, որոնց համար ստեղծված իրավիճակն ընդամենը դիտարժան շոու է: Հրաբխից համեմատաբար ոչ հեռու գտնվող հյուրանոցները լեփ-լեցուն են իրենց պատշգամբներից հրաբխի ժայթքմանը հետևել ցանկացող զբոսաշրջիկներով:
«Իհարկե, բիզնեսի տեսանկյունից շատ ձեռնտու է, բայց որպես տեղացի՝ անհանգստացած եմ»,-նշել է հյուրանոցներից մեկի աշխատակիցը:
Հիշեցնենք, որ հրաբխի ժայթքումը տեղի է ունեցել հունվարի 23-ին: Խառնարանից լավան դուրս է ժայթքել մինչև 700 մետր բարձրության վրա, իսկ մոխրի սյունը հասել է մինչև 3 կիլոմետրի:
Սեյսմոլոգների կողմից վերջին օրերին գրանցված բոլոր ցնցումներից սա ամենաուժեղն է եղել: Տեղի իշխանությունները վտանգի մակարդակը հնարավոր հինգ բալից բարձրացրել են չորրորդի: Տարհանման գոտին հրաբխի շուրջ ընդլայնվել է մինչև 8 կիլոմետր՝ անդրադառնալով հազարավոր մարդկանց վրա:
