Հունվարի 25-ի գիշերը՝ ժամը 2-ի սահմաններում Լեռնային Ղարաբաղի և Ադրբեջանի զորքերի շփման գծում ադրբեջանական զինուժի կողմից դիվերսիոն ներթափանցման փորձի հետևանքով ղարաբաղյան կողմը կորուստներ և վիրավորներ չունի։ Այս մասին «Ազատությանն» ասաց Լեռնային Ղարաբաղի նախագահի աշխատակազմի ղեկավարի տեղակալ Դավիթ Բաբայանը։
«Իրավիճակը կայուն է և լրիվ վերահսկվում է Արցախի Հանրապետության պաշտպանության բանակի կողմից: Այս պահի դրությամբ որևէ այլ արտառոց դապք տեղի չի ունեցել»,- նշեց ղարաբաղցի պաշտոնյան:
Պաշտոնական հաղորդագրության համաձայն, Լեռնային Ղարաբաղի և Ադրբեջանի հակամարտ զորքերի շփման գծի հարավարևելյան, մասնավորապես, Կուրոպատկինոյի ուղղությամբ տեղակայված հայկական դիրքերից մեկի պաշտպանական հատվածում ԼՂ պաշտպանության բանակի առաջապահ ուժերի կողմից «հավաստանշվել է ադրբեջանական հետախուզադիվերսիոն խմբի ներթափանցման փորձ»։ Հաղորդագրության համաձայն՝ ձեռնարկված կանխարգելիչ գործողությունների արդյունքում ադրբեջանական հատուկջոկատայինները հետ են շպրտվել:
ԼՂ ՊԲ-ն հաղորդում է նաև, որ նախնական տվյալներով՝ հակառակորդի կողմից կան կորուստներ: Ըստ ադրբեջանական APA լրատվական գործակալության, Ադրբեջանի պաշտպանության նախարարությունն, իր հերթին, հերքել է ղարաբաղյան կողմի պնդումները՝ վստահեցնելով, թե ադրբեջանական բանակն ամբողջովին պահպանում է հրադադարն ու որևէ կորուստ չունի:
«Ազատության» հետ զրույցում Դավիթ Բաբայանը նաև հետևյալ դիտարկումն արեց՝ միջազգային հարթակներում հակամարտության կողմերի համար կազմակերպվող ամեն հանդիպումից հետո Ադրբեջանի իշխանությունները նման քայլի են դիմում։ Բաբայանը հիշատակեց նաև Հայաստանի նախագահ Սերժ Սարգսյանի երեկ ունեցած ելույթը Եվրոպայի խորհրդի Խորհրդարանական վեհաժողովի նստաշրջանում։ Սարգսյանը պատասխանելով ադրբեջանցի պատգամավորի հարցին՝ ասել էր․ «Դուք ուզում եք Ադրբեջանի կազմ վերադարձնել Ղարաբաղը։ Ցավոք սրտի, այլատյացությունն Ադրբեջանում այնքան է զարգացել, որ արդեն դուք բացահայտ հայտարարում եք, որ Ղարաբաղը ձեզ պետք է առանց հայերի, անհնար է, դա երբեք չի լինելու»։
«Ուրեմն նոր եղել է Հայաստանի և Ադրբեջանի արտգործնախարարների կրակովյան հանդիպումը, համանախագահների միջնորդությամբ, այնուհետև Հայաստանի նախագահը հանդես եկավ կարոր մի ելույթով եվրապական հարթակներից մեկում: Բացի դրանից՝ ներկա դրությամբ Ստեփանակերտում է գտնվում ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկը: Հիմա այս ամենի ներքո ադրբեջանական կողմը դիմում է այսպիսի աննարմալ քայլի, ինչի՞ համար, որևէ տրամաբանություն չկա»,- շարունակեց Դավիթ Բաբայանը:
Հայաստանի կառավարության այսօրվա նիստից հետո անցած գիշեր տեղի ունեցած դիվերսիոն փորձին է անդրադարձել նաև Հայաստանի արտգործնախարարի տեղակալ Շավարշ Քոչարյանը, ասելով՝ նորություն չէ, որ միջազգային հանդիպումներից առաջ, ընթացքում կամ հետո Ադրբեջանն ակտիվացնում է իր նման քայլերը։
«Այստեղ կարելի է մի ենթադրություն անել՝ արտգործնախարարների վերջին հանդիպումը, որի ժամանակ Ադրբեջանը ստիպված գնաց որոշակի քայլերի՝ ուղղված Կասպշիկի խմբի ընդլայնմանը, դա իրենց ձեռնտու չէր, և հիմա այդպես են արտահայտում իրենց դժգոհությունը: Բայց մյուս կողմից պարտադրված գնում են քայլերի, որոնք նախանշված են դեռևս Վիեննայի պայմանավորվածությամբ»,- ասաց Շավարշ Քոչարյանը:
