Արդարադատության նախարարությունը ներկայացրել է «Պետական կառավարման համակարգի մարմինների մասին» ՀՀ օրենքի նախագիծը, որով նախատեսված են մի շարք փոփոխություններ:
Ըստ նախագծի՝ սահմանվել է պետական կառավարման համակարգի մարմինների ընդհանուր բնութագիրը և դրանց կազմավորման կարգը, նախատեսվել է Կառավարությանը, վարչապետին և նախարարություններին ենթակա մարմինների շրջանակը:
Վարչապետին ենթակա մարմինները գործում են ազգային անվտանգության, ոստիկանության, պետական պահպանության և պետական վերահսկողության ոլորտներում:
Վարչապետին ենթակա մարմիններն են՝
1) Ազգային անվտանգության ծառայությունը.
2) Ոստիկանությունը.
3) Պետական պահպանության ծառայությունը.
4) Պետական վերահսկողական ծառայությունը:
ՀՀ «Ազգային անվտանգության մարմինների մասին» ՀՀ օրենքում փոփոխություններ և լրացումներ են նախատեսված:
Հայաստանի Հանրապետության ազգային անվտանգության մարմինների միասնական համակարգը կազմված է վարչապետին ենթակա Ազգային անվտանգության ծառայությունից (այսուհետ՝ լիազորված մարմին), նրան ենթակա մարզային մարմիններից, սահմանապահ զորքերից, ուսումնական կենտրոններից, հատուկ նշանակության և այլ ստորաբաժանումներից, ինչպես նաև քննչական մարմնից:
Լիազորված մարմնի գործունեության ընդհանուր ղեկավարումն իրականացնում են Կառավարությունը և վարչապետը:
Լիազորված մարմինը ղեկավարում է տնօրենը, որին նշանակում և ազատում է վարչապետը՝ օրենքով սահմանված կարգով:
Լիազորված մարմնի ղեկավարն ունի տեղակալ, որին ղեկավարի առաջարկությամբ նշանակում և ազատում է վարչապետը:
Լիազորված մարմնի համակարգում սահմանված կարգով գործում են հետախուզական, հակահետախուզական և ռազմական հակահետախուզության ստորաբաժանումներ:
Լիազորված մարմինը Հայաստանի Հանրապետության տարածքում իրականացնում է ազգային անվտանգության խնդիրներին առնչվող հետախուզական գործունեություն իրականացնող մարմինների և ստորաբաժանումների աշխատանքի օպերատիվ ղեկավարումը:
Լիազորված մարմնի կառուցվածքը սահմանվում է օրենքով և ծառայության կանոնադրությամբ:
Ազգային անվտանգության մարմինները լիազորված են՝
.գաղտնի հիմունքներով համագործակցել դրա համար համաձայնություն տված անձանց հետ.
.օրենքով սահմանված կարգով հետաքննություն և նախաքննություն կատարել, իրականացնել օպերատիվ-հետախուզական միջոցառումներ, Հայաստանի Հանրապետության օրենսդրությանը համապատասխան ունենալ և օգտագործել ձերբակալվածներին պահելու վայրեր.
.ներթափանցել հետախուզական և այլ գործունեություն իրականացնող օտարերկրյա պետությունների հատուկ ծառայություններ ու կազմակերպություններ, ինչպես նաև հանցավոր խմբավորումներ, որոնց գործունեությունը կարող է վնասել Հայաստանի Հանրապետության ազգային անվտանգությանը.
.օրենքով սահմանված կարգով տեղեկատվական անվտանգության ոլորտում իրականացնել պետական վերահսկողություն, ինչպես նաև համակարգել Հայաստանի Հանրապետության օրենսդրությամբ պաշտպանվող տեղեկատվության գաղտնագրային և տեխնիկական պաշտպանության բնագավառի գործունեությունը, սահմանել Հայաստանի Հանրապետությունում տեխնիկական հետախուզություններին հակազդման կազմակերպման միասնական կարգը.
.պետական մարմիններից և կազմակերպություններից, օրենքով սահմանված կարգով, ստանալ տեղեկություններ, որոնք անհրաժեշտ են ազգային անվտանգության մարմինների վրա դրված պարտականությունների կատարման համար, բացառությամբ այն դեպքերի, երբ Հայաստանի Հանրապետության օրենսդրությամբ տեղեկությունների ստացման հատուկ կարգ է սահմանված.
.ազգային անվտանգության մարմինների իրավասության սահմաններում, Հայաստանի Հանրապետության միջազգային պայմանագրերի հիման վրա, համագործակցել օտարերկրյա պետությունների հատուկ ծառայությունների և իրավապահ մարմինների հետ ու սահմանված կարգով, փոխգործակցության հիման վրա, նրանց հետ փոխանակել օպերատիվ տեղեկություններ, հատուկ տեխնիկական և այլ միջոցներ.
.անցկացնել Հայաստանի Հանրապետության ազգային անվտանգության հիմնահարցերի գիտական հետազոտություններ.
.վարչապետին և նրա հանձնարարությամբ այլ պետական մարմիններ և կազմակերպություններ տեղեկատվություն ներկայացնել Հայաստանի Հանրապետության ազգային անվտանգությանն առնչվող հարցերի մասին.
.բացահայտել, կանխել և խափանել ահաբեկչական գործողությունները.
սահմանել ազգային անվտանգության մարմիններում իսկական և պայմանական անվանումների կիրառման և շնորհման կարգը և այլն:
«Ազգային անվտանգության մարմինների գործունեության նկատմամբ վերահսկողությունն իրականացնում են Կառավարությունը և վարչապետը՝ Սահմանադրությամբ և օրենքով իրենց վերապահված լիազորությունների շրջանակներում:
Սույն նախագծի ընդունվելու դեպքում օրենքն ուժի մեջ է մտնում Հանրապետության նորընտիր նախագահի կողմից իր պաշտոնի ստանձնման օրը: