Կոստա Ռիկայի լողափերից մեկում տեղատվության ժամանակ համրուկի ձագը խրված է մնացել երկու քարերի արանքում և չի կարողացել ինքնուրույն դուրս գալ: Բարեբախտաբար, մինչև մակընթացության սկսվելը նրան փրկել է տեղացի Դիրք Մորգանը:
AdMe.ru-ն գրում է, որ միջադեպից առաջ լողափում փոթորիկ է եղել. տեղատվությունից հետո այնտեղ խրված համրուկը սկսել է արտասվել:
Նշվում է, որ Մորգանի հյուրը զբոսնելու ժամանակ լսել է լացի ձայնը, սակայն չի օգնել ձագին և պատմել է իր տեսածի մասին Դիրքին, որն էլ որոշել է փրկել նրան մակընթացությունից:
Դիրքի խոսքով՝ տեղ հասնելուն պես ինքը տեսել է համրուկին, որի աչքերում ավազ է հավաքված եղել: Մարդուն տեսնելով՝ ձագը սկսել է բարձր գոռալ:
Տղամարդն անմիջապես չի օգնել կենդանուն՝ մտածելով, որ ձագի մայրը պետք է մոտակայքում լինի: Համոզվելով, որ մոտակայքում մեծ կենդանիներ չկան, նա զգուշորեն ազատել է ձագին, դրել սրբիչներով արկղի մեջ ու տարել տուն, որտեղ իր կնոջ հետ լվացել է համրուկին և մաքրել նրա աչքերը: Կենդանին նույնիսկ անուն է ստացել՝ Գուանաբանա:
«Այնուհետև համրուկին տարա կենդանիների փրկությամբ զբաղվող կենտրոն, որը գտնվում է իմ տան մոտակայքում: Ձագը հոգնած էր, բայց երջանիկ», - պատմել է տղամարդը: