ՀՀ գյուղատնտեսության նախարար Իգնատի Առաքելյանն այսօր կառավարության նիստից հետո լրագրողների հետ զրույցում հայտնեց, որ գյուղոլորտի համար դիզելային վառելանյութը կսուբսիդավորվի: «Չնայած դիզելային վառելանյութի սուբսիդավորումը նախատեսված չէր, բայց հաշվի առնելով այն հանգամանքը, որ ունենք հանձնարարական ՀՀ նախագահի կողմից, վերլուծել ենք շուկայում իրավիճակը և պատրաստում ենք ծրագիր, որը մենք կներկայացնենք և կշարունակենք սուբսիդավորումը»,-ասաց նա և նշեց, որ մեխանիզմի, չափաքանակի և վերջնական գնի մասին լրացուցիչ կտեղեկացնեն:
Իգնատի Առաքելյանի խոսքով՝ դիզվառելիքի գնի մինչև 440 դրամ բարձրանալու հեռանկարը էականորեն չի ազդում գյուղատնտեսական արտադրանքի վրա: «Կարտոֆիլի, խաղողի, լոլիկի բերքի արժեքի վրա շատ ազդեցություն չի ունենում, մինչև 1-1.5 դրամ, այսինքն՝ դա էական չի: Ցորենի, դաշտավարության, կերային մշակաբույսերի ու հացահատիկի վրա դա ազդում է: Իրականում, եթե նորմալ ագրոտեխնիկական միջոցառումներ են կիրառվում, մինչև 3.5-4 դրամ ազդում է 1 կիլոգրամ արժեքի վրա»,- ասաց նա։
Անդրադառնալով խորհրդատվական ծառայության վերակազմակերպմանը` Իգնատի Առաքելյանը նշեց, որ ծառայության որակը և արդյունավետությունը բարձրացնելու համար փոփոխություններ են իրականացրել:
«Խորհրդատվության ծառայությունն ուղղված է լինելու նաև պետական ծրագրերին և միջազգային կառույցների կողմից իրականացվող ծրագրերին, թե ինչպես կարելի է օգտվել ծրագրերից, որքան արդյունավետություն կապահովի և մոնիթորինգ կիրականացվի, թե քանի ֆերմեր օգտվեց մեր ծրագրերից, որքան հասցեական գնացին պետության կողմից տրամադրվող սուբսիդավորման գումարները»,-ասաց նա և նշեց, որ խորհրդատվական ծառայությունը նաև պատասխանատու կլինի ազդակները հավաքագրել ներկայացնել մարզերից և ներկայացնել հիմնադրամին:
Իգնատի Առաքելյանը նշեց, որ ևս երեք նոր ծրագիր են իրականացնում և բոլոր ծրագրերն ուղղած են լինելու ինտեսիվ գյուղատնտեսության և ավելի արդյունավետություն բարձրացնող գյուղատնտեսությանը: «Արդյունավետ գյուղատնտեսությունն է այն ճանապարհը, որ թույլ կտա մեզ նվազեցնել ինքնարժեքը գյուղմթերքի և սպառողների համար»,-ասաց նա:
Նա նաև նշեց, որ մատչելի կաթիլային ոռոգման համակարգի ծրագիրը մեկնարկել է և հույս հայտնեց, որ շատ գյուղացիներ կօգտվեն կարկտապաշտպան ցանցեր:
