Թուրքիայի վարչապետ Բինալի Յըլդըրըմը հայտարարել է, որ ԱՄՆ-ի պես պետության համար շատ նվաստացուցիչ է քուրդ զինյալների հետ համագործակցությունը, գրում է թուրքական gazeteduvar.com.tr կայքը:
«Իրանից մինչև Միջերկրական ծով ու Սիրիայի հարավ՝ 1350 կմ-ի ամբողջ երկայնքով մենք թույլ չենք տա որևէ ահաբեկչական միջանցքի ձևավորում: Ուզում է Եփրատի արևմուտքը լինի, ուզում է՝ արևելքը: Ահա այսքան պարզ ու բացահայտ ենք ասում: ԱՄՆ-ի պես պետության համար շատ նվաստացուցիչ է նման ահաբեկիչների հետ գործարքի մեջ մտնելը», - ասել է Յըլդըրըմը:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ:
Ինչպես ավելի վաղ հայտնել է tert.am-ը՝ ԱՄՆ նախագահ Դոնալդ Թրամփն իր թուրք պաշտոնակից Ռեջեփ Թայիփ Էրդողանի հետ հեռախոսազրույցում պահանջել է սահմանափակել Աֆրինում ռազմական գործողությունը։ Նա հայտարարել է լարվածությունը նվազեցնելու և խաղաղ բնակչության շրջանում զոհերից խուսափելու անհրաժեշտության մասին: