«ՀՀ նախագահի պաշտոնում առաջադրելով նախկին վարչապետ, Մեծ Բրիտանիայում ՀՀ դեսպան Արմեն Սարգսյանի թեկնածությունը, նախկին պատգամավոր Թևան Պողոսյանի կարծիքով, նախագահ Սերժ Սարգսյանը նպատակ է հետապնդում կայունություն պահպանելու, նա ավելի ընկալելի թեկնածու է և չի առաջացնում «հանրային ձգվածություններ»: Aravot.am-ի հետ զրույցում Թևան Պողոսյանն ասաց, որ ՀՀԿ-ն իր ներսից ում թեկնածությունն էլ փորձեր առաջադրել, խնդիրներ կառաջանային հենց հանրային ընկալումների մակարդակում: Բայց, կարծում է, այս առաջադրումը նաև նոր հնարավորություններ է տալիս երկրին: Մեր հարցին՝ ո՞ւմ է հակակշռելու Արմեն Սարգսյանն իշխանությունում, Թևան Պողոսյանը պատասխանեց. «Անհատների հակակշռելու խնդիր չէ: ՀՀԿ-ն կարծես ունի բոլոր հնարավորությունները՝ ամեն տեղ դա ինքնըստինքյան անելու»: Արդյո՞ք այս նշանակում-ընտրությունը կլինի Սերժ Սարգսյանին իշխանությունից հեռացնելու սկիզբ: Թևան Պողոսյանի կարծիքով՝ Սերժ Սարգսյանը միշտ էլ կարողացել է բալանսավորել: «Ու եթե այս նշանակմամբ Սերժ Սարգսյանը հավասարակշռելու է պրոռուսական կառավարությունը՝ լավ է: Բայց սրանով պետք չէ ուրախանալ: Մենք պետք է ուրախանանք նրանից, որ ունենանք պրոհայկական կառավարություն և պրոհայկական նախագահ, և ամեն ինչ անենք, որպեսզի Հայաստանն ավելի լավ դիրքերում լինի»,- ասաց մեր զրուցակիցը»,-գրում է թերթը:
Նյութն ամբողջությամբ կարդացեք թերթի այսօրվա համարում:
