ترکیې خبرداری ورکړی دی چې په سوریه کې د کردانو په مشرۍ د امریکا پر متحدو وسله والو ښايي برید وکړي.
روسیې سوریې او ترکیې پر امریکا انتقاد کړی چې د سوریې په شمال کې یې د کردانو په مشرۍ د ملېشو د ۳۰ زره کسیز سرحدي ځواک په جوړولو کې مرسته کړې ده.
ولسمشر رجب طیب اردوغان پرون وویل متحد ایالات اوس اعتراف کوي چې زموږ د هېواد په اوږدو کې یو تروریستي ځواک جوړوي.
اردوغان زیاته کړه، اوس زموږ مسؤلیت دی چې دا تروریستي ځواک له جوړېدو مخکې ویجاړ کړو.
اردوغان وویل د سوریې د شمال په افرین سیمه کې د کردانو په مشرۍ پر ځواکونو د حملې لپاره تیارۍ بشپړې شوي.
هغه زیاته کړه په دې سیمه کې د امریکايي ځواکونو له حضور سره سره ښايي دا عملیات هره شېبه پیل شي.
دمشق د دې سرحدي ځواک جوړېدل پر خپل ملي حاکمیت پرضد ښکاره برید او له نړیوالو قوانینو سرغړونه بللې ده.
د امریکا په مشرۍ ایتلاف ویلي چې هدف یې دا دی چې په راتلونکو څو کلونو کې شااوخوا دېرش زره کسیز سرحدي امنیتي ځواک جوړ کړي.
په پام کې ده دغه ځواک د هغو سیمو په پولو کې ځای پرځای شي چې د سوریې د ډیموکراټیکو ځواکونو تر ولکې لاندې دي.
د امریکا په مشرۍ ائتلاف وایي، شااوخوا ۲۳۰ تنه اوس مهال په لومړنیو روزنو بوخت دي.
