Սիրիայի հյուսիսում գտնվող Աֆրին շրջանն իրենց ենթակայության տակ պահող քրդական զինված ջոկատների (PYD/YPG) դեմ Թուրքական ԶՈւ-ի կողմից նախապատրաստվող ռազմական գործողությունը կարող են սկսել Թուրքիայի աջակցությունը վայելող «Սիրիական ազատ բանակ» ընդդիմադիր խմբավորման զինյալները:
Ինչպես գրում է թուրքական «Հյուրրիյեթ» պարբերականը, Աֆրինի գործողության պլանի մանրամասների մասին արդեն խոսվել է երկրի զինվորական բարձր շրջանակների «հետնաբեմում»:
Ըստ այդ տեղեկությունների՝ «Սիրիական ազատ բանակ»-ը, որը դեռևս 2016 թվականի օգոստոսին Սիրիայի հյուսիսում Թուրքիայի նախաձեռնած «Եփրատի վահան» ռազմական գործողությունից հետո իր դիրքերն է պահպանում Աֆրինից արևելք ընկած Ջերաբլուս շրջանում, կարող է առաջին հարվածը տալ քրդական ջոկատներին: Ավելի ուշ զրահատանկային տեխնիկայով նրանց պետք է միանա թուրքական ԶՈւ-ն՝ հարավից (Իդլիբից):
Նշվում է, որ Թուրքիան նպատակ ունի նաև գրավել տեղի ռազմական օդանավակայանը՝ զրկելով քուրդ զինյալներին օդային աջակցությունից:
Հիշեցնենք, որ Թուրքիայի նախագահ Ռեջեփ Թայիփ Էրդողանը նախօրեին, սպառնալով մի քանի օրում ոչնչացնել Սիրիայի քուրդ գրոհայիններին, հայտարարել էր, որ ռազմական գործողությունը կարող է սկսել մոտ ժամանակներս: