Qırımda mahkeme «Hizb ut-Tahrir» figurantınıñ qadınına nisbeten tizilgen protokol baqılacaq otırışıvnı kününi deñiştirdi

Qırımda aqmescitli «Hizb ut-Tahrir işi» figurantı Uzair Abdullayevniñ ömür arqadaşı Fera Abdullayevanıñ memuriy işinen alâqalı mahkeme otırışuvınıñ künü 2018 senesi yanvarniñ 17-ne avuştırıldı, dep bilidre Qırım.Aqiqat muhbiri.


Fera Abdullayeva Rusiye Memuriy uquq bozma Kodeksiniñ 17.3 maddesi 2-nci qısmına binaen «Mahkeme belgilegen tertipni teminlev içün qadı ya da mahkeme icracılarınıñ buyruğını becermemek» şekilindeki memuriy uquq bozuvda qabaatlana. Bunıñ içün beş yüz ile biñ ruble arasında cöreme ya da on beş küngece memuriy apis cezası berilebile.


Dekabrniñ 8-nde «Hizb ut-Tahrir işi» boyunca nevbetteki otırışuv keçirilgende Abdullayeva Qırım Yuqarı mahkemesi binasınıñ ekinci qatındaki meydançıqta beklep turğan eken. Mahkeme icracıları mahkeme qapalı olğanını aytıp, qadınnı mahkeme koridorına kirsetmegenler. Bundan soñ mahkeme icracıları Abdulayevanıñ birinci qatqa enmesini rica etkenler. O, itiraz etken soñ, onu tutup, protokol tizmek içün bir yerge çekkenler.