Մարդու իրավունքների եվրոպական դատարանի կողմից արձանագրած խախտումների համար խախտումներ թույլ տված դատավորները պետք է պատժվեն, սակայն դա վիճակն ամբողջովին չի շտկի:
Այս մասին Tert.am-ի հետ զրույցում ասաց փաստաբան Երվանդ Վարոսյանը, անդրադառնալով ՄԻԵԴ-ում ՀՀ ներկայացուցիչ, Նախարարների կոմիտեում Հայաստանի պատվիրակության ղեկավար Գևորգ Կոստանյանի այն հայտարարությանը, որ խնդրին լուծում տալու բաղադրիչներից մեկն այն է, որ դատավորների նկատմամբ կարգապահական վարույթի հիմք հանդիսանան նաև ՄԻԵԴ վճիռները:
«Համաձայն եմ, որ դատավորները որևէ կերպ ինչ-որ պատասխանատվության ենթարկվեն: Կարծում եմ, որ կա պատճառ, որ Գևորգ Կոստանյանը, ով ամենօրյա շփման մեջ է Եվրոպական դատարանում քննվող գործերի ընթացքի հետ, նման նախաձեռնությամբ է հանդես գալիս: Դա պայմանավորված է նրանով, որ տարիներ շարունակ նույնանման խախտումները չեն դադարում: Բնականաբար խախտումները երբևէ չեն բացառվելու, սակայն տարիներ շարունակ նույն խախտումներն է տեղի ունենում և հասկանալի է դառնում, որ իրավիճակը ինչ-որ կերպ պետք է շտկել»,-ասաց Վարոսյանը:
Փաստաբանի խոսքով՝ Եվրոպական դատարանի մի շարք որոշումներում դատարանի կողմից ուղղակիորեն նշվում է, որ Հայաստանը նույն խախտումներն է թույլ տալիս, ինչն էլ Կոստանյանին կարող է ստիպել, որ մտածեն իրավիճակը փոխելու մասին:
«Սակայն, համաձայն լինելով այն գաղափարի հետ, որ այո դատավորն իր մաշկի վրա պետք է զգա իր կողմից կատարած խախտման հետևանքը, այնուամենայնիվ համոզված եմ, որ միայն դրանով իրավիճակը չի էլ շտկվելու: Այսինքն, որքան ուզում եք պատժեք, միևնույն է, նա խախտումը թույլ է տալու քանի դեռ ինքը դատական անկախ մարմնի մասնիկ չի դարձել, քանի դեռ ինքը հրահանգ կատարող է: Դատավորին պատժելը միակ լուծումը չի կարող լինել: Ի վերջո, պետք է ունենանք դատական համակարգ, ոչ թե դատավորների «վարչություն»:
2017 թվականի նոյեմբերի 28-ի դրությամբ 2017թ. ընթացքում Եվրոպական դատարանի՝ ՀՀ վերաբերյալ կայացված վճիռներով դիմումատուներին հատկացվել է 79,765 եվրոյին համարժեք ՀՀ դրամ: Ներկայացված վիճակագրության համաձայն՝ 2002-2016 թվականները ՄԻԵԴ արձանագրած խախտումների 28,7%-ը կամ կայացված 104 վճիռներից 32-ում ՄԻԵԴ-ն արձանագրել է, որ ՄԻԵԿ 6-րդ հոդվածի խախտում՝ արդարացի դատական քննության իրավունքի խախտում :
