Թուրքիայի ընդդիմադիր Ժողովրդահանրապետական կուսակցության անդամ, խորհրդարանի հայազգի պատգամավոր Սելինա Դողանը Մեջլիսում ունեցած վերջին ելույթի ընթացքում հայտարարել է, որ եթե Թուրքիայի իշխանությունները շարունակեն նույն ոգով առաջ շարժվել՝ Թուրքիայի ժողովրդին կդատապարտեն հավերժ խավարի:
Հայազգի պատգամավորի ելույթի տեսանյութը հրապարակվել է նրա twitter-ի պաշտոնական էջում:
Սելինա Դողանը հիշեցրել է, որ Եվրամիության կողմից՝ երկրի ժողովրդավարացմանն ուղղված նախագծերի իրականացման համար տրամադրվող ֆինանսական ռեսուրսները նպատակային չեն ծախսվում:
«Կամ դուք Թուրքիան կտանեք գիտության, կրթության, մոդեռնիզմի ու ժողովրդավարության ճանապարհով, կամ էլ Թուրքիան կդատապարտեք հավերժ խավարի, որը հետագայում ոչ մի բյուջեով չեք կարողանա սրբել», - ասել է Դողանը:
Ավելի վաղ Դողանը պահանջել էր հատուկ հետաքննություն սկսել Թուրքիայի իշխանությունների կողմից որպես Եվրամիության անդամակցության թեկնածու երկիր ժողովրդավարական բարեփոխումների համար մինչ օրս ստացած 2.9 միլիարդ եվրո գումարի ծախսման վերաբերյալ։
Հիշեցնենք, որ շաբաթներ առաջ էլ ԵԽԽՎ-ն հավանության է արժանացրել Թուրքիայում ժողովրդավարական կառույցների գործունեության մոնիթորինգի վերաբերյալ օրինագիծը: Օրինագծի հիմքում ընկած է Թուրքիայում վերջին շրջանում մարդու իրավունքների, մամուլի ազատության, օրենքի գերակայության ոլորտում գրանցված լուրջ հետընթացի մասին վկայող զեկույցը: