Վրաստանում տեղի է ունեցել Սերժ Սարգսյանի դիմավորման պաշտոնական արարողությունը (տեսանյութ)
ՀՀ Նախագահ Սերժ Սարգսյանը դեկտեմբերի 25-ին երկօրյա պաշտոնական այցով մեկնել է Վրաստան: Վրաստանի նախագահ Գիորգի Մարգվելաշվիլիի ֆեյսբուքյան պաշտոնական էջը հայտնում է, որ Մարգվելաշվիլին և նրա տիկինը՝ Մակա Չիչուան նախագահի նստավայրում ընդունել են ՀՀ նախագահ Սերժ Սարգսյանին և ՀՀ առաջին տիկնոջը՝ Ռիտա Սարգսյանին:
Վրաստանի նախագահի պաշտոնական էջի փոխանցմամբ՝ տեղի է ունեցել է ՀՀ նախագահի դիմավորման պաշտոնական արարողությունը։
Նշենք, որ ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից ավելի վաղ հայտնել էին, որ այցի շրջանակներում Հանրապետության Նախագահը հանդիպումներ կունենա Վրաստանի բարձրագույն ղեկավարության՝ նախագահ Գիորգի Մարգվելաշվիլիի, վարչապետ Գիորգի Կվիրիկաշվիլիի, խորհրդարանի նախագահ Իրակլի Կոբախիձեի, ինչպես նաև Համայն Վրաստանի Կաթողիկոս-Պատրիարք Իլյա Երկրորդի հետ:
Հանդիպումների ընթացքում կքննարկվեն բարեկամ երկու պետությունների միջև մի շարք ոլորտներում փոխգործակցության օրակարգի առանցքային հարցեր: Նախագահ Սարգսյանը կայցելի նաև «Հովհաննես Թումանյանի տուն» գիտամշակութային կենտրոն և Սուրբ Գևորգ եկեղեցի, որտեղ հանդիպում կունենա հայկական համայնքի ներկայացուցիչների հետ: Այցի շրջանակներում Նախագահը Թբիլիսիի «Հերոսների» հրապարակում ծաղկեպսակ կդնի հուշակոթողին և հարգանքի տուրք կմատուցի: