«Կինոպարկ»-ն առաջին անգամ Հայաստանում կինոէկրանին ցուցադրել է ռուսական Մեծ թատրոնի «Շելկունչիկ» բալետը
Առաջին անգամ Հայաստանում՝ կինոթատրոնի էկրանին, ցուցադրվեց Ռուսաստանի օպերայի և բալետի պետական ակադեմիական թատրոնի «Շելկունչիկ» բալետը:
«Երևան Մոլ»-ում գտնվող «Կինոպարկ»-ում դեկտեմբերի 23-ին և 24-ին հայ հանդիսատեսը հնարավորություն ունեցավ վայելել Պյոտր Չայկովսկու հեքիաթային ստեղծագործության ամենանոր ձայնագրությունը Մեծ թատրոնի լավագույն արտիստների կատարմամբ:
«Շելկունչիկ»-ի 2014թ. ներկայացումը բեմադրվել է աշխարհահռչակ Յուրի Գրիգորովիչի կողմից: Ցուցադրությանը ներկա էին ոչ միայն երեխաներ, այլև՝ մեծահասակներ:
«Կինոպարկ»-ի ներկայացուցիչ Մարինա Ղամբարյանը Tert.am-ի հետ զրույցում նշեց, որ բացառիկ ցուցադրությունը հայ հանդիսատեսի համար կազմակերպվել է Ամանորից առաջ ուրախ ու հեքիաթային տրամադրություն ստեղծելու համար: Նա ասաց, որ Մեծ թատրոնում ոչ բոլորը կարող են նայել բալետը և պատահական չէ, որ ձայնագրության երկօրյա ցուցադրություններն անցել են լեփ-լեցուն կինոդահլիճում:
««Շելկունչիկ»-ի բացառիկ ցուցադրություն անցկացնելու մտադրությունը դեռ սեպտեմբերին էր քննարկվում: Մենք ուզում էինք մեր հանդիսատեսի համար մի հետաքրքիր ու կախարդական երեկո անցկացնելու հնարավորություն տալ և որոշեցինք, որ Ամանորից առաջ պետք է նման ցուցադրություն անցկացնենք:
Սա մեր առաջին փորձն է մեծ էկրանին ցուցադրել բեմական ներկայացում: Կան ներկայացումներ, որոնք չենք բեմադրում, կան ներկայացումներ, որի պարողները՝ պրիմա-բալերինաները, այլևս չեն պարում և դիտել այդ եզակի տեսագրությունները էկրանին հնարավորություն են ստեղծում դասական արվեստի հետ կապի մեջ մնալ»,- նշեց Մարինա Ղամբարյանը:
Նա նշեց, որ «Կինոպարկ»-ն ունի նման ցուցադրություններ անցկացնելու պայմանագրեր ոչ միայն ռուսական, այլև՝ բրիտանական, ամերիկյան թատրոնների հետ և առաջիկայում շատ հնարավոր է, որ ցուցադրվեն օպերային և թատերական ներկայացումներ:
Ի դեպ, «Շելկունչիկ» բալետը ցուցադրվել է ոչ միայն Ռուսաստանի, այլև՝ ԱՊՀ մի շարք երկրների մեծ էկրաններին: Իսկ Հայաստանում այն ցուցադրվեց «Կինոպարկ»-ի շնորհիվ: