Բացառում եմ, որ Խոսրովի անտառի հրդեհի պատճառը եղանակային պայմաններն էին. Ա. Մինասյան
ՀՀ բնապահպանության նախարար Արծվիկ Մինասյանն այսօր մամուլի ասուլիսին տարվա հիմնական խնդիրը ոլորտում համարեց հրդեհները:
Նրա խոսքով, ըստ նախնական հաշվարկների, հրդեհի մեջ ընդգրկված ընդհանուր տարածքը կազմում է մոտ 2200 հա, որտեղ չայրված տարածքը՝ 365 հա, շատ քիչ այրվածը՝ 525 հա, միջին այրվածը՝ 1200 հա, շատ այրվածը՝ 110 հա: Հրդեհված տարածքում գտնվող կաղնու անտառները քիչ են վնասվել և հիմնականում վնասվել են գիհու նոսր անտառները և խոտածածկը:
Այս տարի «Խոսրովի անտառ» պետական արգելոց է այցելել 1252 զբոսաշրջիկ, որից 802-ը վճարովի, որի արդյունքում ստացվել է 2 034 500 դրամ:
Արծվիկ Մինասյանը նշեց, որ անտառների պահպանությունն առաջնային է լինելու, փոխվելու է սկզբունքը, և անտառները չեն շահագործվելու։
Ինչ վերաբերում է հարցին, թե ի վերջո հրդեհի պատճառը մարդկային գործո՞նն էր, Արծվիկ Մինասյանը նշեց, որ հարուցված քրեական գործերը հսկողության տակ են: Նա կարևորեց հրդեհի պատճառահետևանքային կապի լիարժեք բացահայտումը:
«Ես եղանակային պայմաններով պայմանավորված հրդեհը բացառում եմ։ Իսկ թե ինչ է տեղի ունեցել, գործի քննությունը կբացահայտի»,-ասաց նա և նշեց, որ եթե չկարողանան հստակ պատճառահետևանքային կապը տեսնել, պայքարը չեն կարող կազմակերպել:
Նա վստահեցրեց, որ գործի բացահայտման հարցում ամենաշահագրգիռ կողմը կառավարությունն է: Նախարարը նշեց, որ ոչ մի փաստ չի բացառում, բայց հարցը գտնվում է քրեաիրավական գնահատականների դաշտում: