Ֆրանսիացի ակտիվիստ Բատիստ Դյուբանշեն ճանապարհորդություն է իրականացրել Փարիզից մինչև Նյու Յորք՝ 10 ամսվա ընթացքում սնվելով միայն ժամկետանց մթերքներով:
Ինչպես ներկայացնում է Daily Mail-ը, Բատիստի մենյուում ընդգրկվել է վեց տարվա բրինձ, 10 տարվա ոսպ և 50 տարվա մեղր: Ֆրանսիացու ճանապարհորդությունը 10 ամիս է տևել: Նախ նա տեղաշարժվել է հեծանվով, ապա օվկիանոսը հատել է նավով և կրկին անցել հեծանվարշավի: Այդ ողջ ընթացքում 29-ամյա տղամարդը սնվել է միայն ժամկետանց սննդամթերքով՝ ապացուցելու համար, որ մարդիկ չափազանց շատ պիտանի մթերքներ են դեն նետում:
Ճանապարհորդը պատմել է նաև ուղևորության դժվարությունների մասին. նա ստիպված է եղել հաղթահարել փոթորիկը, բացի այդ նավին մեկ անգամ կետ է մոտեցել, ինչպես նաև նա հոգնել է միօրինակ սննդից:
Ակտիվիստը հույս ունի, որ իր նախաձեռնությունից հետո կառավարությունն ուշադրություն կդարձնի մթերքների ոչնչացման խնդրին: Նրա կարծիքով՝ թարմ մթերքներն անհրաժեշտ է չորացնել, ոչ թե դեն նետել, իսկ ձավարեղենի վրա ընդհանրապես պիտանելիության ժամկետ չպետք է լինի նշված:
