Яңгырлар яву ихтималына карамастан, бу атнада Татарстанда шактый җылы һәм уңайлы һава торышы урнашачак. Бу хакта ТР Гидрометеорология үзәге тараткан фараздан билгеле булды.
Сишәмбегә, 20 августка, каршы төндә явым-төшем ихтималы аз. Республиканың кайбер районнарында томан төшәчәк. Көндез, атмосфера фронты үткәндә, урыны белән бераз яңгыр ява, яшен булырга мөмкин. Һава температурасы тәүлекнең караңгы вакытында +9..+14, ә якты вакытында +21..+26 градус тәшкил итәчәк.
Чәршәмбе, 21 августта, төбәктә янәдән бераз яңгырлар көтелә: төнлә бөтен җирдә, ә көндез исә нигездә көнчыгышта. Термометр баганалары төнлә +12..+17, көндез +19..+24 градус күрсәтәчәк.
Пәнҗешәмбе һәм җомга, 22 һәм 23 августта, Татарстандагы һава торышын көнбатыштан килгән антициклон билгели. Димәк, явым-төшем ихтималы зур түгел. Төнлә һәм иртән кайбер урыннарда томан булырга мөмкин. Төннәр янәдән салкыная — +8 градустан +13 градуска кадәр. Көндез исә һава +19..+25 градуска кадәр җылына.
Метеорологларның якынча мәгълүматларына караганда, «шимбә [24 августта] республикага төньяк-көнбатыш циклонының атмосфера фронты якынлашачак». Шул ук циклон Татарстанга якшәмбе, 25 августта, да йогынты ясавын дәвам итә. Бераз һәм уртача яңгырлар ява. Тәүлекнең якты вакытында термометр баганалары +19..+24 градуска кадәр күтәрелә.