Бүген Әстерхан өлкәсенә эш сәфәре кысаларында Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразыев вице-губернатор, Әстерхан өлкәсе Губернатор администрациясе җитәкчесе Павел Паутов белән очрашты. Бу хакта Бөтендөнья татар конгрессы матбугат хезмәте хәбәр итә.
Очрашу барышында узган елгы Бөтенроссия Сабантуе нәтиҗәләре, Сабантуйны РФ төбәкләрендә уздыруның файдасы турында фикер алыштылар. Әстерханлылар Бөтендөнья татар конгрессы вәкилләрен «Дуслык» татар милли мәдәнияте җәмгыятенең юбилей чарасына чакырды. Моннан тыш, Әстерхан өлкәсе татарларына даими ярдәм күрсәтеп торулары өчен, Бөтендөнья татар конгрессы вәкилләренә рәхмәт сүзләре яңгырады.
Очрашу вакытында Әстерхан өлкәсе татарлары, губернатор И.Ю.Бабушкинның сәясәтен, эшен тулысынча хуплауларын белдереп, сентябрьдә узачак губернатор сайлауларына әзерлек эше алып баруларын һәм аңа сайлауларда җиңү теләүләрен әйтеп үттеләр.