Дәүләт Думасы эшләүче пенсионерларның пенсияләрен индексацияләүне 2025 елдан кире кайтару турындагы закон проектын сишәмбе пленар утырышта беренче укылышта кабул итте. Бу хакта «РИА Новости» яза.
Эшләүче пенсионерларның пенсияләрен индексацияләү Россиядә 2016 елда туктатылды. Бу механизмны яңадан кайтару турындагы закон проектын «Бердәм Россия» фракциясенең барлык депутатлары 20 июньдә Дәүләт Думасына кертте. Проектны РФ Хөкүмәте һәм Думаның хезмәт, социаль сәясәт һәм ветераннар эшләре буенча профильле комитеты хуплады.
РФ Хезмәт һәм социаль яклау министры Антон Котяков әйткәнчә, 2025 елдан иминият пенсияләрен арттыру ике тапкыр үткәреләчәк һәм ул эшләүче пенсионерларга да, эшләмәүчеләргә дә кагылачак. Бу – 2025 елның 1 февраленнән һәм аннан соң ел саен факттагы инфляция дәрәҗәсе буенча индексацияләү һәм 2025 елның 1 апреленнән индивидуаль пенсия коэффициенты бәясен индексацияләү.
«Бердәм Россия» фракциясе җитәкчесе урынбасары Андрей Исаев билгеләп үткәнчә, эшләүче пенсионерларның 8 ел дәвамында (2016 елдан 2024 елга кадәр) алынмаган акчалары югалмаячак. Алар пенсионер эшләвеннән туктагач кире кайтарылачак. Ул шулай ук иминият пенсиясен индексацияләү проценты эшләүче һәм эшләмәүче пенсионерлар өчен бертөрле булачагын аңлатты. Эшләүче пенсионерларга индексацияләү хәзер ала торган «туңдырылган» пенсиядән түгел, ә алар эшләмәгән очракта алырга тиеш булган максималь пенсиядән исәпләнәчәк.
Индексацияләү нәтиҗәсендә ирешелгән арттыру суммасы пенсионерның «кулына» ала торган пенсиясенә өстәләчәк, ә 2016-2024 елларда алынмый калган акчаларны исәпкә алып арттырылган пенсияне элеккечә эштән азат ителгәннән соң гына алырга мөмкин булачак, дип аңлатты «РИА Новости»га Дәүләт Думасы депутаты Светлана Бессараб.
