Казанда БРИКС илләренең спорт уеннары зур уңыш белән узды, Россиядән соң берләшмәдә рәислек итәчәк Бразилия өчен бик югары планка куелды. Татарстанның спорт министры Владимир Леонов шундый фикер белән уртаклашты.
«Бик күп авырлыклар булды. Проект өр-яңа иде. БРИКС кысаларында мондый дәрәҗәдәге ярышлар үткәрелгәне юк. Без, Россия, Татарстан һәм Казан, бик югары планка билгеләдек. Күп кенә спортчылар Олимпиада белән чагыштыра. Бу форматның киләчәге зур. Бразилиядән коллегалар белән әле генә очраштык, мондый дәрәҗәдәге ярышларны кабатлау авыр булачак, диделәр. Без, әлбәттә, аларга ярдәм итәчәкбез», – диде ул.
Министр искәрткәнчә, башта Казанда БРИКС уеннарында катнашу өчен 10га якын җыелма команданы җәлеп итү планлаштырылган булган, әмма аларның саны 84кә кадәр арткан. Әле Мәскәүдә брейкинг һәм акробатик рок-н-ролл буенча ярышлар узачак, шуннан соң ярышларның төп нәтиҗәләре ясалачак.
