Ёшлар ижод саройида “Ҳунарманд” уюшмаси ташаббуси билан мамлакатимизда илк бор “Ҳикматлар олами” республика хаттотлик фестивали ўтказилди деб хабар берди xs.uz Хаттотларнинг ижодий ишларини кенг ёйиш, уларни халқимизга таништириш ва қўллаб-қувватлаш мақсадида ўтказилаётган ушбу фестивалда юздан ортиқ ижодий ишлар кўргазмага қўйилди. Турли наққошлик, чилангарлик, каштачилик, меъморлик буюмлари, китоблар, гиламу сўзаналар, миниатюра ва тасвирий санъат асарларига туширилган битикларда муқаддас Қуръон оятлари, ҳадису ҳикматли сўзлар жой олган. Фестиваль иштирокчилари “Энг моҳир хаттот”, “Хаттотликда тасвирий воситалар уйғунлиги”, “Насҳ хати бўйича энг моҳир хаттот”, “Настаълиқ хати бўйича энг моҳир хаттот”, “Сулс хати бўйича энг моҳир хаттот”, “Девоний хати бўйича энг моҳир хаттот”, “Меъморий хаттот”, “Хаттотлик китобларини яратган моҳир хаттот”, “Қуръон хаттотлиги”, “Тафсир кўчирган хаттот”, “Энг ёш хаттот” номинациялари бўйича тақдирланди. Фестиваль доирасида уюштирилган кўргазма шу йилнинг 3 февралигача давом этади.
