Наманган шаҳридаги чорраҳаларга ўрнатилган йўл ҳаракати қоидалари бузилишини қайд этувчи видеокузатув камералари 2017 йил 1 ноябрдан расман фаолиятини бошлайди бу хақида daryo.uz Наманган вилоят ИИБ матбуот хизматига таяниб маълум қилди. «Хавфсиз шаҳар» концепцияси асосида шаҳар ҳудудидаги 6 та — Ислом Каримов номли кўчада 2 та (Ғирвонсой кўчаси ва Оромгоҳ кўчаси билан кесишган чорраҳалар), Алишер Навоий номли кўчада 3 та (Қўқон, Марғилон ва Уйчи кўчалари билан кесишган чорраҳалар) ҳамда Саноатчи ва Соҳилбўйи кўчалари кесишмасидаги чорраҳага автоматлаштирилган замонавий видео ва фото қайд этиш воситлари ўрнатилди. Фото: Наманган вилоят ИИБ матбуот хизмати Энди мазкур камералар жамоат тартибини сақлаш, содир этилган жиноятларни фош этишда қўлланилиши билан бирга, чорраҳаларда светофор ишоралари, бўлакларга ажратувчи ва тўхташ чизиқлари, тезлик меъёрларига амал қилмаслик, транспорт оқимига қарама-қарши ҳаракатланиш ва авария ҳолатларини келтириб чиқариш каби йўл ҳаракати қоидабузарликларини аниқлайди. Қоидабузарликлар юзасидан чора кўриш ишларини ташкил этиш мақсадида «маъмурий амалиёт» электрон тизими ташкил этилади. Ушбу тизимда қоидабузарлик тўғрисида маъмурий баённома расмийлаштирилмасдан жарима солиш тўғрисидаги қарор материаллар илова қилинган ҳолда почта орқали транспорт воситаси эгасининг яшаш манзилига юборилади. Фото: Наманган вилоят ИИБ матбуот хизмати Жаримани бу ҳақдаги қарор чиқарилган санадан бошлаб 60 кун мобайнида тўлаш лозим. Жарима муддатида тўланмаган тақдирда транспорт воситаси вақтинчалик жарима майдонига тортилади.
