“რა გჭირთ (გვჭირს), ხალხო!..
არ შემიძლია, არ გამოვეხმაურო ბატონ გია დვალის live ინტერვიუს და მის გარშემო ატეხილ “ჭრელ” აჟიოტაჟს.
უპირველეს ყოვლისა, მე, როგორც მეცნიერი-მედიკოსი, უდიდეს პატივისცემას გამოვთქვავ ბატონ გიას მიმართ. ასეთი დონის და ასე რენომირებული მეცნიერი საქართველოს (დიდი ხანია) არ ჰყოლია:
✓ პროფესორი – ნიუ იორკის უნივერსიტეტის კოსმოლოგიისა და ნაწილაკების ფიზიკის ცენტრი,
✓ პროფესორი – მიუნჰენის ლუდვიგ-მაქსიმილიანის უნივერსიტეტი,
✓ ნაწილაკებს ფიზიკისა და კოსმოლოგიის განყოფილების დირექტორი, მაქს პლანკის ფიზიკის ინსტიტუტი, მიუნჰენი.
ასეთი პროფესიონალითა და ინტელექტუალით იამაყებდა ნებისმიერი ქვეყანა. და როგორ ექცევიან ინტერვიუერები? აწყვეტინებენ სიტყვას, უნდათ ყველაფერი ბინძურ პოლიტიკაში გადაიტანონ!!!
ფიზიკოსები ფილოსოფოსები არიან. ბატონი გია საუბრობდა ზოგადსაკაცობრიო პრობლემებზე ამ დაწყევლილი ომის პერიოდში.
ნებისმიერი განსხვავებული აზრი აღქმული იყო ინტერვიუერების მიერ, როგორც “მიშისტობა”. ამ დროს, რესპოდენტი გამოთქვამდა სკუთარ აზრს, როგორ შეიძლება უკეთესები გავხდეთ.
მოუსმინეთ განსხვავებულ აზრს!
“მარტო შენი მტერი დაგიმალავს, შენს სახეზედ რომ ურიგობა ჰნახოს რამე, მოყვარე კი მაშინვე სარკეს მოგიტანს, რომ გაისწორო და ხალხში არ შერცხვე” – მათთვის, ვისაც (ჯერ კიდევ) არ გაგიგიათ, დიდი ილიას სიტყვებია!
ერთერთი მაღალი თანამდებობის პირი დაემუქრა კიდევაც ზელენსკის, “ომი დამთავრდება და მერე მოგივლით შენაო”!?!
ზიგმუნდ ფროიდი ავსტრიელი ებრაელი იყო და ფაშიზმს გაექცა ვენიდან. მის ბინაში მოწყობილია სახლ-მუზეუმი – განთქმული “წამოსაგორებელი” ტახტით ფიქოანლიზის ჩასატარებლად. იქვე ახლოს მისთვის მიძღვნილი ქვის სტელაა, რომელსაც მისი სიტყვები აწერია: “Die Stimme des Intellekts ist leise” – “ინტელექტის ხმა ჩუმია”. სამწუხაროდ, არ აწერია გაგრძელება: “aber sie ruht nicht, bis sie Gehör gefunden hat” – მაგრამ იგი არ ჩერდება, სანამ გაგონილი არ იქნება”.
რამ გაგაბოროტათ ასე? რა გჭირთ (გვჭირს), ხალხო! რამდენი ილია უნდა მოვჰკლათ კიდევ?
ბინძური ხელები შორს გია დვალისაგან!!!
ძირს პუტინის სისხლიანი რეჟიმი! – წერს სოციალურ ქსელში ვენის სამედიცინო უნივერსიტეტის პროფესორი, სოსო ნანობაშვილი.
