«Veciye Kaşka davasınıñ» iştirakçisi, qırımtatar faali Asan Çapuh dört künden berli açlıq tuta. O, Aqmescit SİZOsınıñ tibbiy bölüginde oña acele tibbiy yardım kösterilmesini talap ete. Bu aqta Çapuhnıñ advokatı Ayder Azamatov onı izolâtorda ziyaret etken soñ Qırım.Aqiqatqa isbatladı.
«O, SİZO reberligine açlıq aqqında haber etti. Onıñ esas talabı – eñ azından tedaviylemege başlamaları. Çapuhnıñ alı fena: qan basımı arta, başı ağıra, sol ayağı ve qolu çalışmay», – dep ayttı Azamatov.
Çapuhnıñ advokatına bildirgenine köre, SİZOdaki tibbiy bölükte oña yardım kösterilmey.
«Onı tedaviylemegenlerini ve açlıq mecburiy adım olğanını ayta. Tibbiy yardım kösterilmese, açlıqnı toqtatmaycaq. Tibbiy bölükte oña ilâc bereler ve oldı. Men ekim degilim, lâkin añlayım ki, izolâtornıñ tibbiy hadimleri onı tedaviylemek içün bir şey yapmay», – dep añlattı Azamatov.
Advokatnıñ aytqanına köre, Çapuh vatandaş hastahanesinde baqtırıldı, lâkin anda tedaviylenmedi. Rusiye taqiqatçısı da bugün SİZOda edi, o, vaziyetni ögrenip, Çapuhqa tibbiy yardım ne sebepten kösterilmegenini bilmege tırışacağını vade etti.
«Taqiqatçı Çapuhnıñ evinde keçirilgen tintüv vaqtında bar edi, şimdi ise ögünde bam-başqa adam olğanını köre. O, SİZO yolbaşçısından mabüsni ne içün tedaviylemegenlerini ögrenecek, dedi», – dep qoştı Azamatov.
Advokat, Çapuhnı açlıq tutmamağa çağırdı, amma ricasına tam bir cevap alamadı. Mabüs, «tedaviylenmegence açlıq tutacağını» bildirdi. Azamatov SİZOnıñ tibbiy bölük areketlerini Rusiye politsiyası ve prokuraturasına, em de Rusiye ombudsmenine şikâyet etecek ola.
Çapuhnıñ açlıqqa başlağanını jurnalist Anton Naumlük bildirgen edi.
2017 senesi noyabrniñ 23-nde Aqmescitte Rusiye telükesizlik hadimleri – Kâzim Ametov, Asan Çapuh, Ruslan Trubaç ve Bekir Degermenci kibi bir gruppa qırımtatarnı tutıp aldı.
Sentâbrniñ 11-nde Rusiye nezaretindeki Aqmescit Kiyev rayon mahkemesi, «Veciye Kaşka işiniñ» iştirakçilerini eki ayğa daa apiste qaldırdı.
Olar Türkiye vatandaşı Yusuf Aytandan para talap etüvde şeklene. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra qadın vefat ete.
Qırımtatar milliy areketiniñ faali Nariman Celâl, Türkiye vatandaşı, Veciye Kaşkanıñ qorantasından para hırsızlağan edi, dep bildire.
Mezkür dava iştirakçileriniñ sağlığı fenalaşa. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
