AQŞ Maliye nazirligi Qırımnıñ ilhaqı ve Moskvanıñ ihtimal ile Amerikadaki prezident saylavına qarışması içün Rusiyege tazyıq etmge ve şu cümleden qoşumça şahsiy sanktsiyalarnı tatbiq etmege devam etecek.
Bunı AQŞ Maliye nazirinñ muavini Sigal Mandelker Atlantik şurasında yapqan çıqışında bildirdi.
«Biz, toqtamayıp Ukrainadaki vaziyetni stabilsiz alğa ketirmege areket etkeni içün ve ayrıca Qırımnıñ işğali ve anda insan aqlarını muntazam surette bozğanı içün Rusiyege tazyıq etüv üzerinde diqqatımıznı topladıq. Ondan ğayrı AQŞ Maliye nazirliginiñ yanaşuvı Rusiyeniñ Amerikadaki saylavğa qarışqanına esaslana», – dedi o.
Ondan ğayrı Mandelker, AQŞ Maliye nazirligi tarafından daa evel neşir etilgen Rusiye prezidenti Vladimir Putinniñ etrafında bulunğan yüksek rutbeli siyasetçiler ve oligarhlar cedveli, kelecekteki sanktsion sıñırlavlarnıñ işlep çıqılması içün qullanılacaq, dep qayd etti.
Daa evel AQŞ Maliye nazirligi, servetleri ve akimiyetlerini, bildirilgenine köre, Rusiye prezidenti Vladimir Putin ile sıqı munasebette olğanları içün qazanğan 114 yüksek rutbeli siyaset erbabı ve 96 «oligarh»tan ibaret cedvelni neşir etti. Ondan ğayrı, cedvelniñ ilâvesi aqqında söz yürsetildi. Onıñ tafsilâtları belli degil.
Yanvar 30-da AQŞ Maliye naziri Stiven Mnuçin, Rusiyege qarşı yañı sanktsiyalarnıñ azırlanğanını, ve muessisesiniñ olarnı yaqın bir qaç ay içinde ilân etecegini bildirdi.
