Путин Россия төбәкләре җитәкчеләре белән коронавирус вазгыяте буенча фикер алышачак
(Казан, 27 апрель, «Татар-информ»). Россия Президенты Владимир Путин сишәмбе көнне РФ төбәкләре җитәкчеләре белән киңәшмә уздырачак. Анда коронавирус инфекциясе таралу белән бәйле вазгыять турында фикер алышачаклар. Бу хакта дәүләт башлыгы матбугат секретаре Дмитрий Песков сүзләренә сылтама белән Sputnik радиосы хәбәр итә.
«Иртәгә Президент белән Россия субъектлары җитәкчеләренең коронавируска каршы көрәш мәсьәләләре буенча киңәшмә әзерләнә. Ул видеоконференция режимында булачак», — диде Дмитрий Песков.
Ул искәрткәнчә, киңәшмәдә илнең барлык төбәк җитәкчеләре дә катнашачак.
Элегрәк Владимир Путин РФ Хөкүмәтенә яңа коронавирус инфекциясе таралуга бәйле рәвештә вазгыять начараю шартларында 30 апрельгә кадәр Россия икътисадының база секторларына ярдәм итү планын эшләргә кушты. Документны эшләгәндә РФ Президенты сәнәгатьтә импортны алмаштыру программаларын стимуллаштыруга аерым игътибар бирергә кушты.