Медьковонь 27-це чистэ Зубова Полянасо тешкстасызь посёлкань 345 иень ды Зубова-Полянань буень теемань 96 иетнень. Покшчинь мероприятиятне ютыть буень культурань кудонть вакссо. Эрицятнень ды инжетнень туртов кармить важодеме тевень невтема, ярмунка, эйкакшонь аттракционт ды фотонь теема тарка. Весень учи спортонь сюпав программа, лувсонзо ветерантнэнь ютксо шахматонь пелькстамо ды городошной спортонь коряс мастер-класс. Мелень явицятненень мереви кодамс кекшемань сетть ды окопонь штатолт. Концертэнть панжсы Людмила Дюдяева Россиянь заслуженной артисткась, морыть-киштить Мордовиянь государственной филармониянь артисттнэ, Сарансто «Земляки» морокурось, Торбеевасто «Околица» ансамблясь ды «Шугайзеры» Зубова-Полянань рок-группась.
