«Ուրբան Լոջիստիք Սերվիսիս» (Urban Logistic Services (ULS)) ընկերությունը համագործակցության պայմանագիր է ստորագրել ֆրանսիական Generix Group ընկերության հետ, որը Եվրոպայում զբաղվում է լոգիստիկ ոլորտում առեւտրային ցանցերի, լոգիստիկ օպերատորների եւ սննդի արտադրողների համար ՏՏ համակարգերի մշակմամբ եւ ներդրմամբ:
Համագործակցության շրջանակում ULS-ը նախնական փուլում ներդնելու է պահեստային կենտրոնի համար նախատեսված ծրագրային ապահովման համալիր լուծումներ՝ գործարկելով պահեստի ղեկավարման GCS WMS (Generix Collaborative Supply Chain Warehouse Management System) համակարգը:
Ընկերությունում նշել են, որ GCS WMS համակարգի ներդրումը թույլ կտա միջազգային չափանիշներին համապատասխան բարձրակարգ սպասարկում ապահովել իր գործընկերների համար՝ շնորհիվ պահեստային բոլոր գործընթացների ավտոմատացման ու օպտիմալացման:
«Հայաստանում եւ Կովկասում նմանատիպը չունեցող վերոհիշյալ ծրագրային լուծումները կօգնեն արդյունավետ իրականացնել պահեստային համալիրում ապրանքային հոսքերի մշակումն ու մաքսիմալ թափանցիկություն ապահովել բոլոր տիպի բեռների եւ հաճախորդների հետ աշխատանքում: Բոլոր ապրանքների, ապրանքային խմբերի ու դրանց պահպանման տեղի իդենտիֆիկացման, ինչպես նաեւ բոլոր գործողություններին օնլայն ռեժիմով հետեւելու հնարավորության շնորհիվ ULS ընկերության մասնագետները եւ օպերատորներն այսուհետ կարող են օպերատիվ կերպով ու առավելագույն արդյունավետությամբ ղեկավարել հաճախորդների պատվերների կատարումը»,- ասված է ULS-ի տարածած հաղորդագրությունում:
