Ընդդիմադիր շարժման վարչապետի թեկնածուն է Հայ առաքելական եկեղեցու արքեպիսկոպոս, Տավուշի թեմի արդեն նախկին առաջնորդ Բագրան (ավազանի անունը՝ Վազգեն) Գալստանյանը։
Նա երկքաղաքացի է, ունի Կանադայի անձնագիր, և ըստ հայաստանյան սահմանադրության՝ վարչապետ լինել չի կարող։ Ընդդիմությունը համոզված է, որ սահմանադրական արգելքը հնարավոր է շրջանցել «հանրային ճնշմամբ», որը գործադրելու համար մայրաքաղաքում առավոտյան մի քանի փողոցներ են փակվել։
տե՛ս Ա՛ջ, ա՛ջ, ա՛ջ․ տերտերը հանրահավաքով մտավ Երևան
օգնության է հասնում ազգային-ազատագրականը
Ինչպե՞ս է արքեպիսկոպոսը «վարչապետի թեկնածու լինելու պարագան» համատեղելու «հոգևոր հանգամանքի» հետ։
«Լեզուս էլ չի պտտվում ասելու՝ վարչապետի թեկնածու լինելու առնչությամբ [․․․] ես, Վեհափառ Հայրապետին և իմ հոգևոր եղբայրներին ներկայացնելով իրավիճակը, խնդրել եմ 30-ամյա իմ հոգևոր ծառայությունը սառեցնել», – երեկվա հանրահավաքին հայտարարել է Գալստանյանը։
Անորոշ բացատրությանը ծափահարություններ, թմբկահարություններ և վանկարկումներ էին հաջորդել՝ «Սըր-բա-զա՜ն վար-չա-պետ, սրբազա՜ն վարչապե՜տ»։
Հանրահավաքին վարչապետի թեկնածու Գալստանյանը եկեղեցական սքեմով էր եկել, համազգեստի վրայից քաղաքական վզկապ էր։ Նույն վզկապից ունեին նաև նրա թիկունքում կանգնած կուսակցական գործիչներն, ազգագրական երգիչները, արտիստները․․․
Փորձելով հասկանալ, թե ինչ է նշանակում արքեպիսկոպոսի «սառեցումը», սոցցանցերի օգտատերերը հիշել էին ՀԱՊԿ-ի և Հայաստանի փոխհարաբերությունները։ Հայաստանի ղեկավարը ամիսներ առաջ հայտարարել էր, թե Երևանը սառեցրել է իր անդամակցությունը ռուսական ռազմական դաշինքին։ ՀԱՊԿ-ից արձագանքել էին՝ չեն հասկանում կիրառված եզրույթի բովանդակությունը և կարող են զուտ փաստել, որ Հայաստանը եղել և մնում է ՀԱՊԿ անդամ։
Սառեցումների միջև զուգահեռները անտեղին չէին։
«Բագրատ Սրբազանի եպիսկոպոսական կարգը պահպանվում է, դադարեցված է նրա եկեղեցական և վարչական ծառայությունը», – առավոտյան պարզաբանել են Մայր Աթոռից։
Էջմիածնի փոխանցմամբ, արքեպիսկոպոսը դիմել է Կաթողիկոս Գարեգին Բ-ին և խնդրել «կասեցնել իր հոգևոր ծառայությունը»։ Խնդրանքը քննարկվել է և որոշվել «վերջինիս ընթացք տալ մինչ նոր տնօրինություն»։
Լրագրողների հարցերին պատասխանելով՝ Բագրատ (Վազգեն) Գալստանյանը պարզաբանել է, որ «այլևս Տավուշի թեմում չէ, բայց շարունակում է մնալ արքեպիսկոպոս, պաշտոնաթող չէ, կոչումը վերցված չէ, կարգալույծ չէ»:
Հարցին, թե չի ստացվո՞ւմ արդյոք, որ ինքը համատեղում է հոգևոր ծառայությունը քաղաքականության հետ, արքեպիսկոպոսը պատասխանել է՝ սա քաղաքական հարց չէ, այլ ազգային-ազատագրական։
կիսակուս
Հայալեզու ֆեյսբուքը երեկվանից քննարկում է եկեղեցական կարգերի և աշխարհիկ օրենքների այս բախումը։ Epress.am-ը որոշ մեկնաբանություններ է առանձնացրել․
Գեմաֆին Գասպարյան․ — Իհարկե «Սրբազան վարչապետ» բառակապակցությունը հրաշալի է, ոնց որ «Պլատոնական սեր», «անձեռակերտ կառույց»։ Լավ է մտածված։ Իսկ եթե լուրջ, առանց հետին մտքի հետաքրքիր է. երբ կուսակրոն արքեպիսկոպոսը սառեցնում է իր հոգևոր ծառայությունը, իրեն պետք է շարունակել Սրբազան պատվանվամբ դիմե՞լ, թե՞ չի թույլատրվում և դա խախտում է ՀԱԵ կանոնները, ավազանի անունո՞վ պետք է դիմել, թե՞ ոչ, արդյո՞ք նախկին կուսակրոն արքեպիսկոպոսը իր որոշմամբ ամեն պահի կարող է վերադառնալ հետ հոգևոր ծառայության, թե՞ այլ ընթացակարգ կա, արդյո՞ք կարող է սքեմ և վեղար կրել սառեցված վիճակո՞ւմ։
***
Լուսինե Խառատյան․ — Ինչ-որ մեկը կարո՞ղ է ինձ բացատրել, թե ինչ է նշանակում հոգևոր ծառայությունը սառեցնել կուսակրոն հոգևորականի համար։
Գեմաֆին Գասպարյան․ — Սրբազան վարչապետ
Համլեն Մելքումյան․ — Կիսակուս
Անտոն Իվչենկո․ — Я медленно снимаю свой փիլոն․․․
Ալեքսանդր Շտաերտ․ — (ռուսերենից) ․․․Եպիսկոպոսը արքերեց է, այսինքն՝ բարձրագույն կոչում։ Նախ, նա կուսակրոն է ձեռնադրվել, այսինքն այլևս չի ենթարկվում աշխարհիկ իշխանություններին, ․․․կարող է չենթարկվել նույնիսկ եկեղեցականներին, քանի որ «Աստծո Կամքի» ներքո է։ Եվ նա չի կարող ինքն իր վրայից հանել կուսակրոնությունը, որովհետև դա հրաժարում է Քրիստոսից։ Արքերեցը ձեռնադրված է, ձեռնադրությունը չի կարող սառեցվել կամ կասեցվել։ Միակ բանը, որ հնարավոր է անել արքերեցի դեմ, բանադրել 7 այլ հոգևոր պետերի ժողովով։ Օ՜հ
Յանա Ավանեսյան․ — Կեղծ ու անարժեք «առաջադիմության» պատրվակով անմակարդակ մեկնաբանություններ գրողներին ամենևին չեմ հասկանում, ինչևէ, թող շարունակեն իրենց կեղծ արժեքներով հեգնանքի առարկա դարձնել հենց իրենց։ Ինքս ասվածը հասկացել եմ այլ ձևով. քանի որ թեմի առաջնորդ է, պարտականություններով հոգևորական, բնականաբար ներկա ակտիվությունը հաշվի առնելով իր պարտականությունները՝ ծառայությունը չի կարողանալու պատշաճ անել, ուստի պիտի այս պահին ընտրություն անի։ …
***
Գոռ Մադոյան․
— Գարեգին Բ-ն հոգևոր տարկետում կտրամադրի Բագրատ Սրբազանին
— Հոգևոր ծառայությունը սառեցնելուց հետո Բագրատ Սրբազանը կկոչվի Բագրատ Հետադարձ
— Տավուշի թեմը կանվանակոչվի Բագրատ Անհողինի թագավորություն
— Տավուշը հանուն հայրենիքի «շարժումը» կանցկացնի կուսակրոնության սառեցման դասընթացներ: […]
— Այ որ կուսակրոնության հետ Կանադայի քաղաքացիությունից էլ հրաժարվի ուրեմ լուրջ ա տրամադրված
— Մի քիչ լուրջ
Ես անկեղծ չեմ հասկանում՝ ինչ օրգանով ա պետք մտածել, գիշեր ցերեկ համերաշխությունից խոսելով, երկրում բնական աղետի օրը ցույց անելու համար
Չեմ հասկանում՝ ինչ ա Գարեգին Բ-ն սպասել այսքան ժամանակ եւ միայն վերջերս հորդորել Վազգեն Գալստանյանին «սառեցնել» իր ծառայությունը:
Չեմ հասկանում, թե որն է Վազգեն Գալստանյանի նախաձեռնած այս «դվիժենիի» նպատակը:
Չեմ հասկանում, թե ինչու են արցախցիները որպես կույր գործիք եւս մեկ անգամ օգտագործվում ՀՀ ներքաղաքական պայքարում:
Չեմ հասկանում՝ ինչու է իշխանությունը իր գործիքակազմով ամեն ինչ անում, որ մենք չտեսնենք իրենց ու իրենց ընդդիմության տարբերությունը:
Չեմ հասկանում, թե այս ամենը ինչով է նպաստում ՀՀ դիմադրողականությանը:
Չեմ հասկանում, թե ուր են կորել նեոֆիդայի ոչմիթիզականնները:
Չեմ հասկանում, թե ինձ պես մարդիկ ոնց են դիմանում այս ծաղրանքի ու անլրջության արոտավայրում:
Վարդինե Գրիգորյան․ — Իսկ ես չեմ հասկանում, թե [Սահմանադրության] էս նախադասությունը չհասկացող մի ամբողջ թիմը որտեղից էդքան մեծ ամբիցիաներ ունի․ «…վերջին չորս տարում միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող…»
***
«Ոզնիներ» հեռուստատեսային հաղորդումից.
— Իսկ դուք ի՞նչ կանքով եք ապրում՝ հոգեւո՞ր, թե՞ աշխարհիկ։
— Չնաշխարհիկ, որդյա՛կ իմ։
The post Քաղաքական գարունը ավարտվում է հոգևոր սառեցմամբ first appeared on Epress.am.