Константин Иванов, Андриян Николаев, Никита Бичурин, Тани Юн тата ытти те. Чăваш Ен хăйĕн паллă ывăл-хĕрĕпе мĕн авалтан мухтанма пултарать. Халĕ те пултаруллисем, республика ятне çӳле çĕклекенсем нумай. Вĕсем пирки çитес çул эпир чылай пĕлĕпĕр-ха, мĕншĕн тесен çитес çул Чăваш Енре паллă ентешсен çулталăкĕ тесе палăртнă. Ăна мĕнле ирттермелле? Мĕн çине ытларах тимлĕх уйăрмалла? Çак ыйтусене яш-кĕрĕм сессире сӳтсе яврĕ. Çавра сĕтел тавра саккăр-вуннăн лараççĕ. Журналист, блогер, пресс-секретарь – такам та пур кунта. Вĕсем хутсем çине çыраççĕ, тавлашаççĕ, сĕнӳ параççĕ. Çапла çавра сĕтел тавра ларакансем хĕрсех çитес çула мĕнле ирттересси пирки сӳтсе яваççĕ. Яваплăхĕ пысăк. Мĕн туса ирттермелле, мĕнле кĕтмен парне хатĕрлемелле? Сессие йĕркелекенсем пурин шухăшне те шута илеççĕ. Тĕп тĕллев вара – мухтавлă чăваш ывăл-хĕрĕ çинчен каласа парасси, вĕсен çитĕнĕвĕсемпе паллаштарасси. АЛЕКСАНДР ЯШКОВ: «Пирĕн чăвашсем пĕтĕм тĕнчипе пурăнаççĕ. Кашни хулара, регионра – таçта та пурăнаççĕ. Çавăнпа пирĕн кашни паллă çынна пухмалла. Вĕсем пирĕн нумай». Пĕр çын – пĕр ăс, ик-виç çын – ытларах та тесе ахальтен каламан. Пĕр евĕрлĕ паллă çынсен конкурсĕ, чăваш ывăл-хĕрне пĕр тĕвве пухакан сăн ӳкерчĕксен куравĕ, республика юлташĕсен фестивалĕ тата ытти те – çавра сĕтел тавар пухăннисем нумай сĕнӳ-канаш пачĕç. Вĕсенчен чылайăшĕ çитес çул пурнăçланĕ. Алина Сусметова, Екатерина Никитко, Игорь Зверев
