Тошкент шаҳар Яккасарой тумани Шота Руставели кўчасида 10 октябрь куни содир этилган автоаварияда икки киши ҳалок бўлди.
ЙҲХББнинг билдиришича, соат 21:00 ларда 19 ёшли ҳайдовчи бошқарувидаги Lacetti "Анжир" ресторани рўпарасига етган вақтида бошқарувни йўқотган ва йўл ўртасидаги ёритиш чироғи устунига урилган.
Тўқнашув оқибатида автомобилда ёнғин юзага келган. Ўт ўчирувчилар томонидан ёнғин бартараф қилинган. Ҳодиса натижасида ҳайдовчи Ш.Н., ва бир нафар йўловчи вафот этган. 2 нафар йўловчи тан жароҳати билан шифохонага олиб кетилган.
Аввалроқ Ўзбекистонда 2021 йил бошидан бери то шу кунгача содир этилган 6551 та йўл-транспорт ҳодисасида 1682 киши ҳалок бўлгани билдирилган эди.
Расмийнинг билдиришича, автоаварияларда 5920 киши турли даражадаги тан жароҳатларини олган. Аварияларнинг деярли 40 фоизи тезликни меъёридан ошириш натижасида юзага келган.
