Россия ветеринар ва фитосанитар федерал хизмати мамлакатга Фарғона вилоятидан ҳар қандай ўсимлик маҳсулотларини олиб киришни тақиқлади. Бунга Фарғонадан экспорт қилинган туршакда капр қўнғизининг топилгани сабаб бўлган.
Россельхознадзорнинг билдиришича, 7 декабрь куни Россия ва Ўзбекистоннинг тегишли идоралари орасида ўтган онлайн музокараларда Фарғонадан экспорт қилинган 1 тонна туршакда капр қўнғизининг топилгани муҳокама қилинган.
Хабарда айтилишича, ҳар бир кило туршакда 2 донадан капр қўнғизи личинкаси топилган. Бу эса экспорт қилинган туршак жиддий зарарланганини англатади.
“Капр қўнғизи ҳар қандай заҳирани еб тугатишга қодир зараркунанда ҳисобланади. Унинг мамлакат ҳудудида тарқалиши ўсимлик, жумладан, бошоқли экинларга жиддий зарар келтиради. Шу муносабат билан Россельхознадзор Фарғонадан карантин қилиниши мумкин бўлган ҳар қандай ўсимлик маҳсулотларини экспорт қилинишини тақиқлашга мажбур”,-дейилади Россельхознадзор билдирувида.
Расман билдирилишича, капр қўнғизининг Россияда тарқалиши ортидан йилига 5 миллиард рубль миқдорида зарар кўрилиши мумкин.
3 декабрь куни Ўздавкарантин матбуот хизмати Россияга жўнатилган туршакда капр қўнғизи эмас, балки Марказий Осиё ва Россияда учраб турадиган Trogoderma қўнғизи топилганини билдирган эди.
Ўшанда Ўздавкарантин Россия билан Фарғонадан туршак эскпорт қилишга тақиқ қўйилмаслиги тўғрисида келишиб олинганини иддао қилган.
Аввалроқ Россия Фарғонадан помидор ва булғор қалампири экспорт қилишни тақиқлаган эди.
