Тошкент шаҳрида жойлашган Республика онкология илмий марказидаги мансабдор шахсларнинг кирдикорлари ва фирибгарликлари ҳақида аввал хабар берган эдик.
Ундан кейин бир неча интернет сайтлар ҳам ушбу хабарни босиб чиқишди ва ўша "учлик" ўзлаштирган салкам 2 млрд. сўм пул ҳақида хабар беришди. Гап пулда ҳам эмас, аслида вазият ундан-да ёмонроқ.
Тергов жараёнида аниқланишича, марказ директори С.Наврўзов иш фаолияти давомида "Парасервис-қурилиш" МЧЖ мансабдор шахслари билан олдиндан жиноий тил бириктириб, мансаб сохтакорлигидан фойдаланган ва марказнинг ертўласини таъмирлаш ишлари бўйича тузилган баённомага сохта маълумотлар киритишган.
Бундан ташқари, С.Наврўзов бош ҳисобчи И.Ермичёва ва молиячи Ф.Нарзиев билан жиноий тил бириктириб, жами 802 032 187 сўмни асоссиз кирим қилиб, бюджет ва смета-штат интизомини бузган.
Қолаверса, мазкур "учлик" яна жиноий тил бириктириб, мансаб ваколатини суиистеъмол қилиб, давлат манфаатларига катта миқдорда, 171 070 000 ва 427 056 600 сўм зарар етказишган.
Умумий ҳисобда Республика онкология илмий маркази мансабдор шахслари томонидан 1 905 018 182 сўм миқдордаги маблағ ўзлаштирилиб, ишлатиб юборилган.
Юқоридаги ҳолатлар бўйича Ўзбекистон Республикаси Жиноят кодексининг 209-модда, 2-қисми "а" банди, 184-1-модда, 2-қисми ва 205-модда, 2-қисми "а" банди билан жиноят иши қўзғатилган. Ҳозирда Тошкент шаҳар прокуратураси томонидан тергов ишлари давом эттирилмоқда.
