Татарстан Милли китапханәсе «Тере классика. Яңа ел гаилә укулары» Бөтенроссия проектына кушыла. Акция 15 декабрьдә Россиянең ун шәһәрендә була. Акциядә катнашучылар яраткан әкиятләрен, шигырьләрен һәм әсәрләреннән өзекләрне телдән, рольләргә бүленеп һәм бөтен гаилә белән кушылып укыячаклар. Программада шулай ук танылган театр актерларыннан мастер-класслар һәм иҗади очрашулар тәкъдим ителә. Бу хакта Татарстан Милли китапханәсенең матбугат хезмәте хәбәр итә.
Бөтенроссия акциясенең Татарстан Милли китапханәсе мәйданчыгындагы хедлайнерлары – театр һәм кино актеры Олег Алмазов (Мәскәүнең Малыщицкий камера театры) һәм Татарстанның халык артисты, Галиәсгар Камал исемендәге Татар дәүләт академия театрының әйдәп баручы актеры – Искәндәр Хәйруллин.
Укучылар белән ачык очрашу «Китап блицы» форматында 15 декабрьдә 18.00 сәгатьтә була. Очрашуда катнашу өчен теркәлү сорала.
Акциянең тулы программасы белән Милли китапханәнең телеграм-каналында танышып була.
«Тере классика. Яңа ел гаилә укулары» проекты Президентның Мәдәни инициативалар фонды һәм «Тере классика» фонды тарафыннан Татарстан Милли китапханәсе белән берлектә оештырыла.
