Татарстан Дәүләт Советы Рәисе Фәрит Мөхәммәтшин республика халкын ТР Дәүләт флагы көне белән котлады.
«Инде өч дистә елдан артык республикабызның образы аның төп рәсми символлары – канатлы барс сурәтләнгән герб, Рөстәм Яхин музыкасына иҗат ителгән гимн һәм яшел-ак-кызыл төсләрдәге флаг белән аерылгысыз рәвештә ассоциацияләнә. Аларның һәркайсы күпмилләтле халыкның бай мәдәни һәм рухи традицияләрен үзенчә чагылдыра, Татарстанның үткәнен, хәзергесен һәм киләчәген бергә бәйли», - дип искәртте республика парламенты башлыгы.
«Конституция һәм аерым законнар яклавында булган дәүләт атрибутикасына карата хөрмәт гражданлык һәм патриотик бердәйлек, хакимият институтларына ихтирамлы мөнәсәбәт формалаштыруда, туган илгә мәхәббәт тәрбияләүдә ныклы нигез булып тора», - диде сәясәтче.
«Татарстан байрагы мөһим функция дә башкара: бер генә әһәмиятле вакыйга да – халыкара очрашулар, рәсми сөйләшүләр, спорт һәм иҗтимагый чаралар – безнең флагтан башка узмый, без аңа горурланып һәм күтәренке рух белән карыйбыз», - дип өстәде ул.
«Кадерле татарстанлылар! Бүген Татарстан Россия Федерациясенең югары инвестицион потенциалга ия терәк төбәге санала. Республика сәнәгать һәм авыл хуҗалыгы производствосы, IT-секторны үстерү, торак һәм юл төзелешендә мөһим күрсәткечләр буенча алдынгы позицияләрне били. Без бергәләп масштаблы икътисади һәм социаль программаларны гамәлгә ашырабыз, иң зур форумнарны уңышлы рәвештә үткәрәбез, милләтара тынычлык һәм иҗтимагый татулыкны югары бәялибез», - дип искәртте Мөхәммәтшин.
«Алда – яңа планнар. Ватанның азатлыгын һәм кодрәтен ныгыту, балаларыбыз һәм оныкларыбызның имин тыныч тормышы өчен әле күп нәрсәгә ирешергә кирәк. Сезгә чын күңелдән нык сәламәтлек, уңышлар телим. Барлык бурычларны да бергәләп һичшиксез гамәлгә ашырырбыз дип өметләнәм. Бәйрәм белән!» - дип сүзен төгәлләде ТР Дәүләт Советы Рәисе.
