Казан театр училищесының Өйрәнчек театры яңа театр сезонын IV курс студентларының «Гамлет-машина» спектакле белән ачты.
«Студентлар Мюллерның Россиядә сирәк куелган әсәренә алындылар. Курс җитәкчесе – Татьяна Корнишина. Бу әсәр кыскартылып студентларның үз интерпретациясендә эшләнде», – дип таныштырып үтте Казан театр училищесы директоры Руфина Таҗетдинова.
Ул тиздән бу сәхнәдә Фәрит Бикчәнтәев студентларының диплом спектакльләре булачагын да хәбәр итте. Аның студентлары быел IV курста белем ала.
Спектакль зур аншлаг белән күрсәтелде. Залда нәкъ шушы әсәрне сәхнәдә күрергә теләгән тамашачы да, төрле курс студентлары да, яшь артистларның әти-әниләре һәм укытучылар да бар иде.
