ТР Рәисе Рөстәм Миңнеханов Мәскәүдә Татарстан Республикасы мәдәнияте көннәренә багышланган чараларда катнаша. Бу хакта «Татар-информ» агентлыгына ТР Рәисенең матбугат хезмәте җитәкчесе Лилия Галимова хәбәр итте.
Мәскәү халыкара музыка йортында Татарстанның сәнгать осталары катнашында тантаналы кичә уза. Анда РФ Хөкүмәте Рәисе урынбасары Марат Хөснуллин һәм Мәскәү мэры Сергей Собянин да мактаулы кунаклар сыйфатында катнаша.
Җыелган халыкны сәламләп, Рөстәм Миңнеханов башкала җитәкчелегенә Татарстан белән хезмәттәшлеккә игътибар күрсәткән өчен рәхмәт белдерде.
«Әлеге мөһим традициягә ярдәм күрсәткән өчен Россия Федерациясе Хөкүмәте Рәисе урынбасары Марат Шакирҗан улы Хөснуллинга һәм Мәскәү мэры Сергей Семенович Собянинга чын күңелдән рәхмәт әйтәсем килә. Татарстан халкы өчен республикабызның бай, төрледән-төрле мәдәниятен Мәскәүдә күрсәтү – зур мәртәбә генә түгел, ә зур җаваплылык та», - дип искәртте ул.
«Һәм, әлбәттә инде, Сергей Семенович, сезгә һәм Марат Шакирҗанович, сезгә – зур рәхмәт сүзләре. Безнең илдә гамәлгә ашырыла торган барлык инфраструктур бурычлар – ул Марат Шакирҗанович. Карагыз әле – моннан тыш, без ике ел федераль дәрәҗәдә Казан форумы («Россия - Ислам дөньясы: KazanForum» Халыкара икътисади форумы – Т-и иск.) үткәрәбез. Ул – безнең оештыру комитеты рәисе. Аңа алкышлар һәм рәхмәт сүзләре», - дип өстәде ТР Рәисе, РФ вице-премьерына шәхсән мөрәҗәгать итеп.
«Сергей Семенович – ул ничек эшләргә кирәклекнең үрнәге. Чынлап та шулай, мин ихлас күңелдән әйтәм. Әйе, алкышлар. Бу бик кыйммәтле әйбер. Алар (Мәскәү хакимияте – Т-и иск.) бушлай ярдәм күрсәтә. Иминлек мәсьәләләре, менә күпме чаралар уза. Сергей Семенович Татарстанга (башка төбәкләр турында белмим) кагылышлы теләсә кайсы мәсьәләдә һәрвакыт ачык һәм ярдәм күрсәтә», - дип шәрехләде Миңнеханов Россия башкаласы мэры белән хезмәттәшлекне.
«Сезнең һәркайсыгыз – безнең белән бергә һәм бу – бик зур ярдәм. Безнең белән булганыгыз өчен бик зур рәхмәт», - дип сүзен төгәлләде Татарстан Рәисе.
«Һәм, әлбәттә, ничек кенә булмасын, бүген илебез тормышында җаваплы чор – махсус хәрби операция. Нәрсәдер килеп чыга, нәрсәдер юк, әмма җиңү безнең якта булачак. Менә биредә – безнең геройлар», - дип өстәде Рөстәм Миңнеханов. Аның сүзләреннән соң залда утырган махсус хәрби операциядә катнашучылар урыннарыннан торды һәм яңа алкышларны аларга юлладылар.
Татарстан Республикасының Россия Федерациясендәге Тулы вәкаләтле вәкиллеге видеосы
