Хәзерге катлаулы геосәяси шартларда Россия төбәкләре арасындагы элемтәләр аеруча әһәмияткә ия. Бу хакта Россия Федерациясе Хөкүмәте рәисе урынбасары Марат Хөснуллин ил башкаласында Татарстан мәдәнияте көннәре кысаларында Мәскәү Халыкара музыка йортында тантаналы кичәдә чыгыш ясаганда белдерде.
«Россия Федерациясе Президенты Владимир Владимирович Путин күп тапкырлар Россиянең бөек көче безнең күп конфессияле һәм күп милләтле дәүләтебез халыкларының бердәмлеге һәм дуслыгында булуын билгеләп үтте», - дип ассызыклады вице-премьер.
«Бүген, Россиягә икътисади ысуллар белән генә түгел, безнең күп гасырлык традицияләр аша да йогынты ясарга тырышканда, төбәкара мөнәсәбәтләрне ныгыту аеруча мөһим», — диде ул.
«Уңышлы хезмәттәшлек һәм үзара хөрмәт үрнәге буларак Мәскәү белән Татарстан арасындагы мөнәсәбәтләрне атарга була. Аларны һәрвакыт тирән тарихи һәм мәдәни элемтәләр бәйләде. [Татарстан Республикасының] Мәдәният көннәре инде ун елдан артык, 2012 елдан бирле ел саен Мәскәүдә үткәрелүе куандыра. Бу ике төбәк арасында тыгыз хезмәттәшлекнең тагын бер күрсәткече», - дип өстәде Хөснуллин.
«Мәскәү дә, Татарстан Республикасы да икътисади һәм социаль үсештә, шул исәптән төзелеш һәм безнең гражданнар өчен уңайлы мохит тудыруда алдынгы урыннарны били. Мондый уңыш – аларның талантлы һәм хезмәт сөючән халкының казанышы», - дип билгеләп үтте РФ вице-премьеры.
«Ике төбәкнең дә чәчәк атуына инфраструктура, туризмны үстерү, инвестицияләр җәлеп итү өчен уңайлы шартлар тудыру буенча уртак проектлар ярдәм итә», - дип йомгаклады Марат Хөснуллин.
Татарстан Республикасының Россия Федерациясендәге Тулы вәкаләтле вәкиллеге видеосы
