Казанда Шиһабетдин Мәрҗани исемендәге 2нче гимназиянең яңа корпусын төзү эшләре ахырына якынлаша. Хәзерге вакытта өч катлы бинаның әзерлеге 87 процент тәшкил итә, диелә ТР Төзелеш, архитектура һәм ТКХ министрлыгының матбугат хезмәте хәбәрендә.
Корпус шәһәрнең Мәскәү районында сафка бастырыла һәм ТР Баш инвестиция-төзелеш идарәсе хәбәр иткәнчә, ул остазлар мәктәбе функциясен башкарачак. Бина 270 укучыга исәпләнгән. Алар өчен спорт һәм тренажер залы, күп функцияле мәйданчык, лаборатория, конференцияләр залы, тавыш яздыру студиясе, 12 уку кабинеты һәм танылган татар мәгърифәтчесе Шиһабетдин Мәрҗани, шулай ук рәссам Бакый Урманчега багышланган музей үз ишекләрен ачар дип көтелә.
Хәзерге вакытта эшчеләр вентиляция, җылылык һәм электрика, су белән тәэмин итү системаларын монтажлый, диварларны бизәкләү эшләре дәвам итә. Якын-тирә территория тәртипкә китерелә һәм яктырткычлар урнаштырыла. Биредә спорт мәйданчыгы, йөгерү юллары, воркаут-зона урнашачак. Моннан тыш, бина тирәсендә кече архитектура формалары урнаштырылачак, юкә, артыш һәм чыршы агачлары утыртылачак, газон ясалачак.
