Россиянең кайбер төбәкләрендә, шул исәптән Татарстанда да пилотсыз очкычларны куллану рөхсәт ителергә мөмкин. Бу газ һәм нефть чыгарыла торган магистраль һәм локаль торбаларны күзәтү өчен кулланыла торган дроннарга, шулай ук урман хуҗалыгы объектларын күзәтә торганнарга кагылырга мөмкин.
«Бу мәсьәлә Транспорт министрлыгы һәм Икътисади үсеш министрлыгындагы хезмәттәшләребез карамагында һәм аны алар хәл итәчәк», - дип хәбәр итте Сәнәгать һәм сәүдә министрлыгы җитәкчесенең урынбасары Василий Шпак ТАССка биргән интервьюсында.
Аның сүзләренчә, кайбер пилотсыз очкычларга шулай ук Санкт-Петербург, Ульяновск, Саратов, Волгоград, Түбән Новгород өлкәләрендә һәм башка төбәкләрдә эшләргә рөхсәт ителергә мөмкин.
Искәртик, Татарстан Рәисе Рөстәм Миңнеханов дроннарны куллануны тыю турындагы карарны 2022 елның 25 ноябрендә имзалады. Дәүләт хакимияте органнары һәм алар карамагындагы оешмалар куллана торган пилотсыз очкычлар гына искәрмә булып тора. Бу чара база әзерлеге режимы гамәлдән чыгарылганчы эшлиячәк. Аны РФ Президенты Владимир Путин узган елның октябрендә илнең Үзәк федераль округы субъектларыннан һәм көньягыннан кала барлык төбәкләрендә дә керткән иде.
