(Казан, 17 август, «Татар-информ»). 19 августта «Черек күл» паркында «1960-1970 елларда иҗат иткән Казан рәссам-нонконформистлары» лекциясе узачак.
Аны ТР Дәүләт сынлы сәнгать музееның баш фәнни хезмәткәре Динә Әхмәтова үткәрәчәк. Чара «Мост» арт-лекторие программасы кысаларында узачак.
Казанлылар һәм шәһәр кунаклары совет чорының рәсми һәм рәсми булмаган сәнгате турында белә алачак. Лекциядә Константин Васильев, Игорь Вулох һәм Алексей Аникеенко кебек Татарстанның танылган нонконформист рәссамнары турында сөйләячәкләр.
Лекция паркның амфитеатрында 19:00 сәгатьтә башлана. Керү ирекле, дип хәбәр итә Казан Башкарма комитетының Мәдәният идарәсе.
«Мост» арт-лекторие июль башында эшли башлады. Бу — «Черек күл» паркы амфитеатрында ачык лекцияләр һәм дискуссияләр циклы, аны галимнәр-тикшеренүчеләр, мәдәният һәм сәнгать өлкәсендә Казанның әйдәп баручы белгечләре үткәрә.
