(Казан, 15 декабрь, «Татар-информ»). Татарстан Премьер-министры Алексей Песошин бүген «Челтәр компаниясе» ААҖ директорлар советы утырышын уздырды. Чара видеоконференция режимында узды. Бу хакта ТР Президенты матбугат хезмәте хәбәр итә. Утырышта компания электр челтәрләренә тоташтырылган кулланучыларны электр белән тәэмин итү ышанычлылыгы, җитештерү һәм финанс-икътисади эшчәнлек нәтиҗәләре, агымдагы елның тугыз аенда компаниянең капиталь төзелеш планын үтәү мәсьәләләре, шулай ук 2020 ел нәтиҗәләре буенча фараз күрсәткечләре каралды. Компаниянең 2020/2021 елның көзге-кышкы чорын узуга әзерлеге турында мәгълүматлар өйрәнелде. 2020 елның тугыз ае мәгълүматлары буенча, республика кулланучыларына электр энергиясен тапшыру буенча күрсәтелгән хезмәтләр күләме 17,8 млрд кВт тәшкил иткән. Шул чорда кулланучыларны технологик тоташтыру өчен 12 меңгә якын килешү үтәлгән, аларның гомуми максималь егәрлеге 263 МВт тәшкил итә. Аларның 70 проценты ташламалы категориягә туры килә - бу физик затлар, кече бизнес, шулай ук коммерциячел булмаган оешмалар. Агымдагы елның тугыз аенда 3 401 электр челтәре хуҗалыгы объекты файдалануга тапшырылды, 306 км электр линияләре төзелде, 21 МВА трансформатор егәрлеге файдалануга тапшырылды.
